~~~~~~~~~~~~~~~~







2007年6月2日 星期六

* 90年代俗語–Part 1


90年代俗語–Part One

今年是特區回歸十周年,
十年怱怱過去,
就讓我替大家細數一下,
90年代流行的口頭俗語。


「冧」
「冧」解作喜歡、陶醉的意思,
通常用在男女關係之上。
例句:
男方喜歡女方就會話:「我好冧妳」!
男方做了一些討好女方的事情後就會問:「妳冧唔冧先」?
而女方歡喜的話就會答:「冧哂」!
即很陶醉的樣子,
因此,情歌又叫做「冧歌」。


「溝」
「溝」解作男女、男男、女女之間追求對方的意思,
「溝」指溝通、追求,搭訕、撩、調戲,
「受溝」則指接受、肯定對方的溝通、追求,搭訕、撩、調戲,
「溝」至今天則演變成「界」
例句:
男方問女方會否接受自已就會問:「小姐,受唔受我溝先?」
如果男方遭女方拒絕後就會補一句:「唔受溝?扮乜上菜?」
而「溝」會同「到手」同時使用,
例如:「Yuki終於俾我溝到手啦!」
當時出現一句俗語:「唔理老幼,至緊要受」!
句中的「受」就是指「受溝」。


「好Yeah」
「好Yeah!」解作前衛、大膽和嘩眾取寵的意思,
是今時今日所講「至潮」、「至in」的前身。
通常運用在衣著和打扮身上。
例句:
如果Yoyo著衫很趨時,
就會說:「嘩!Yoyo平日著衫好Yeah架!」
又例如Zuki把頭髮染到七彩,
就會說:「嘩!Zuki妳個頭好Yeah呀!」
這裡,「好Yeah!」等同「好具爆炸性」。


「食腦」
「食腦」解作精於運用腦筋、靠智取不靠力敵的意思,
跟吃猴子腦、豬腦無任何關係,
香港人以賣弄自己的小聰明為榮,
所以都爭相自認係「食腦一族」。
例句:
自認聰明地解決難題後就會說:「好彩我食腦咋」!
不滿其他人蠢就會說:「唔該你食吓腦啦」!


「頂癮」
「頂癮」解作很有趣味、很好玩的意思,
「好頂癮」等於80年代的「好過癮」,
都是指某事物或某人物很風趣惹笑,
帶來感官上的快感!
例句:
某人的日常行為怪異又謊謬時就會話:「嘩!條友好頂癮架」!
某個新推出的電子遊戲很好玩刺激,你會向人推介說:「嘩!呢個game真好頂癮架」!


「啱嘴型」
「啱嘴型」解作雙方的想法相同、說話投契的意思,
「啱嘴型」等於「啱傾」的意思,
跟接吻並無任何關係,
例句:
跟初相識的朋友非常投契就會話:「哈!同你真係啱哂嘴型啦」!
跟某同事話不投機就會話:「我同佢都唔啱嘴型」!


「撻Q」
「撻Q」解作行動最後流產、告吹或者失敗的意思,
「撻Q」跟打「士碌架」有關,
指Q棍因打失球而扣分的意思。
例句:
老闆不滿員工輸了一單生意就會說:「點解單生意會撻Q架」?
應承幫朋友忙而爽約就會俾人話:「個衰仔應承人都撻Q」!
而「撻Q」會同「埋門」同時使用,
「功虧一簣」等於「埋門一腳先撻Q」!


「咁雞」
「咁雞」解作水準低、表現差劣、易損壞的意思,
「雞」指脆弱、體積細小的意思。
「咁雞」跟妓女無直接關係,
例句:
顧客不滿剛購買回來的相機壞了返回店舖投訴:「點解件野咁雞架」?
觀眾睇波時見到弱隊大落後時會嗌:「咁雞?返屋企啦」!
而「咁雞」同英文「chicken」同樣指膽小無用。


「撐」
「撐」解作全力支持的意思,
「我撐你」指我在精神上或行動上全力支持你,
「撐住呀!」指鼓勵別人振作下去,
但「同人撐」指跟別人爭執、理論或嗌交,
同「死雞撐飯蓋」有異曲同工。
例句:
朋友和自己發現有共同利益時就會話:「今舖我撐你呀」!
朋友被老細鬧後,無心機,你安慰他說:「大個仔啦,撐住呀」!
火爆性格的朋友又跟老細口角,你勸告他說:「成日同老細撐,蝕底一定係你」。


「揸fit」
「揸fit」解作當家作主、掌話事權、領導的意思,
「揸fit人」正是指「領導人」。
「揸fit人」跟黑道社團扣上關係,
例句:
落夜總會踩場時會大嗌:「叫你地個揸fit人出黎見我」!
相談去邊度吃飯時會話:「去邊度食呀?你揸fit啦」!
而百貨公司內的「電梯女郎」被戲稱為「揸lift人」。

4 則留言:

  1. 「溝」至今天則演變成「界」

    界是否應為界加刀字旁,如"削"...不過電腦好似打不到出來的....唉呀呀!!

    回覆刪除
  2. 係呀!打唔到界字旁,
    溝到好暴力呀!

    回覆刪除
  3. 𠝹。。。我打到喎,你睇唔睇到?

    回覆刪除

LinkWithin

Blog Widget by LinkWithin