~~~~~~~~~~~~~~~~







2008年1月3日 星期四

健身室風景

健身室風景

部分香港女士認為「瘦白即是美」、
部分香港男士則認為「健碩才是美」,
究竟在健身室會看到什麼風景呢?
我以過來人身份,
為大家數一數健身室十大風景:

第十位:飲奶粉
邊個大隻佬唔飲奶粉?
在更衣室內,健身之前,

有人沖奶粉有人食香蕉,
有人討論邊隻牌子好?邊度賣得最平;
補充好體力才出去舉鐵。

第九位:私人教練
有人愛聘用私人健身教練,
學習正確姿勢之餘、又有人陪健身。
有一些中年婦人愛聘用男教練,
有身體接觸又有人傾計解悶;
男教練向女士提供身軀鍛鍊和心靈慰藉。
同樣男學員也愛揀(靚)女教練。

第八位:照鏡谷肌
健身室的牆壁就是落地大鏡,
供會員操完一組動作後,
立即對鏡檢視肌肉脹大咗幾多吋?
練習震波彈老鼠仔。
會員的滿足感立即從眼睛傳入腦部中樞神經。

第七位:要多條毛巾
會員俾咗月費,
更係有咁多著數攞咁多著數啦!
一個人攞多幾條毛巾,
一條抺身、一條塾腳、一條抺臉、
一條桑拿、一條沖涼、一條洗頭、
一人用幾條毛巾,終於一嘗「豪」的滋味!

第六位:掉啞鈴
會員白天在工作裡受了氣,
晚間到健身室發洩。
舉幾吓超重啞鈴後,
砰砰聲掉啞鈴落地!發洩憤怒情緒!
或者因為太重無力舉,而迫於掉啞鈴落地,
旁人經常聽到砰砰聲,
好似暴龍逐步走近咁、
重base低音傳入耳裡。

第五位:運氣嗌
舉重舉到臨尾幾吓,開始無力,
就要大聲嗌吓嚟幫助發力。
呢邊嗌幾聲!嗰邊嗌幾聲!
此起彼落,仲有鬥大聲的趨勢。
大家覺得越大聲就越man!
嗌聲包括:「Wush!Hah!Hoh!」
如果掉啞鈴的聲音是低音的話,
那麼運氣嗌聲便是高音了!

第四位:桑拿鬥熱
武俠片中兩名俠客於客棧相遇,
搭枱後兩人表面相安無事,
實際兩人正用筷子酒杯比試功力。
桑拿房成為現代比試功力的場地;
兩人於桑拿房內對峙,
不斷撓水加溫,
比試內力耐力,睇吓邊個認輸先走出桑拿房?
難怪有人雖然贏了比試,
但需要付出暈倒桑拿房內的沉重代價。

第三位:長時間霸佔器材
香港精神:生霸死霸,
某些使用者長時間霸佔健身器材。
做2分鐘後,抖足10分鐘,

甚至索性睡覺。
其他人問可否使用器材?
立即回答:「用緊!」
變成山頭主義,各有各霸。

第二位:昅嘢
有些穿得sexy的少女和macho大隻佬,
成為「高收視的被昅對象」。
健身室成為昅與被昅的大廣場;
男昅女、女昅男、男昅男、女昅女,
特別在健身舞房中,
大班男女在房中作多角度近距離互相觀望。
在更衣室內,更成為名正言順的睇肉場!
難怪有人唔做運動都話要上去沖番個涼先啦!

第一位:吹水傾計
喺健身室唔健身剩係健談者,
為數的確不少。
三五之知己放工,聚首一堂,健談一番!
談天說地,吹水作大!
做2分鐘,跟着傾足20分鐘。
除了會員之間吹水,
教練與教練之間巡場吹吓水,
更衣室內員工之間吹水,
會員圍著電視機旁吹水,
或在桑拿房蒸氣房內吹水,
健談完之後感覺如同健完身。
帶著滿足感去洗澡之後離開。

待續



12 則留言:

  1. 健身室有很多同性喜愛留連地方

    回覆刪除
  2. "健身室成為昅與被昅的大廣場;
    男昅女、女昅男、男昅男、女昅女" - which type you belong to?

    回覆刪除
  3. 你今次在"EWWW6七彩包青天"演出什麼角色?希望可欣賞你們的演出,上次沒有機會.

    回覆刪除
  4. vincent,
    多謝先!
    快啲買飛啦!
    角色方面? --我仍然係無角色!

    回覆刪除
  5. Carson,
    剛才在電視看見你在電視風雲的表演 -- 香港電台的"傳媒春秋"。

    回覆刪除
  6. 我嘅一個真人笑話。。。

    話說我唔嘈得,一嘈會頭痛,所以從來唔聽D嘈rock歌

    咁我又想join健身同朋友一齊做運動喎

    以年前嘅某一日,朋友約我係旺角cali門口等佢一齊去食飯

    D sales落足嘴頭tup我入局啦

    我話想睇頭環境, 一上去,D音樂大聲到暈(對我嚟講)

    落番嚟,朋友亦出嚟,佢話價錢唔係最好,唔好join

    另外佢加左句:無間cali係播楊千嬅架,你唔使諗架啦

    回覆刪除
  7. naruto


    原來如此
    係嘅,健身室嘈架
    音樂勁,啲人又嘈
    唖鈴掟落地
    嘈到死...

    不過估唔到你怕嘈
    仲以為你ok添

    回覆刪除

LinkWithin

Blog Widget by LinkWithin