~~~~~~~~~~~~~~~~







2008年12月31日 星期三

2008年十大新聞

2008年十大新聞

每年年尾,香港各大傳媒都會選出十大新聞回顧,都是嚴肅正經的本地國際新聞。
而十大「另類新聞」回顧,就在這裡舉行:

1. 機管局高層嫁女 老千混入喜宴 賓客被騙財 (1月2日)
香港機場管理局總監嫁女,在港島香格里拉酒店舉行婚宴,筵開33席約400賓客赴宴,其間有三名宴會老千扮成戥穿石及姊妹潛入會場,分別在10圍放利是 封,要求各人放入現金玩神秘大抽獎,賓客們入錢後,老千得手後逃之夭夭,估 計約有百人受騙。直至宴會尾聲主人家送客,賓客經查詢才知道上當,報警求助。

2. 忘情熱吻遭車撞 情侶馬路中心飛彈3米 (1月7日)
一對情到濃時的熱戀男女,在微黃的街燈影照下,清晨5時許站在紅磡碼頭巴士總站一條行車通道的路中心忘情熱吻,一輛九巴工程車駛至時仍茫然不知,司機亦未料到竟有此情景,收掣不及將男女撞至飛彈三米外,男子頭部重創性命垂 危,其女友亦告受傷,一同送院治理。

3. 盜骨青年 晚晚「俾鬼責」 (3月5日)
三名青年在網上聲稱有泰國高僧開光的人頭骨「靈物」拍賣,開價28,000元。偷自己祖先金塔內的人頭骨,豈料得手後其中一名青年聲稱晚晚畀鬼責,為擺脫鬼魂纏身,惟有向警方自首,警方拘捕疑涉案17至22歲三男女。

4. 三釣魚友汲水門釣上值百萬巨魚 (4月25日)
三名釣魚人士在汲水門大橋對開的青洲灣海面釣魚,竟釣到一條被稱為「海上鑽石」的巨型黃鰲魚;此魚身長有如一個成年人,估計超過100萬元。因為他們 「唔識寶」,竟以兩萬元賤賣給船家。船家事後以58萬元轉售給海鮮酒家,而酒家再轉賣到內地估計售出100萬元。

5. 中漢1300漢堡包派街坊 抗議麥當勞白鴿眼(7月27日)
一名54歲在內地經營成衣買賣的小商人,不滿深水埗美居中心麥當勞快餐店職員服務態度惡劣、歧視基層街坊及喝罵奚落食客。特別是一名分店經理處處針對阿公阿婆坐低嘆冷氣傾偈!這位「怪客」自掏腰包豪花8,000多元,購買1,300個漢堡包免費派街坊,抗議大企業麥當勞「白鴿眼」對待基層食客。

6. 「活塞男」下體插公園鐵板無法自拔 折騰4小時獲救 (8月7日)
一名中年男子深宵在藍田公園「做運動」做得熱血沸騰,在一塊滿佈圓孔的仰起坐鐵板上,做出另類掌上壓,褪下褲子將陽具插入圓孔內自瀆,至陽具充血脹大無法拔出,緊卡在孔內進退兩難,痛苦難當惟有面懵懵報警求助。醫生到場為他打針放血無效,男事主陽具被卡住近4小時後,消防員最後要鋸去整塊鐵板,連人帶板五花大綁送院救治。

7. 精神病綠巴司機 瘋狂駕駛 胡言亂語搶警槍 (10月6日)
一名38歲患有精神病10多年的專線小巴司機,由西貢開往坑口的小巴時疑病發胡言亂語,大叫:「我細佬俾人殺咗埋屍。」駛離指定路線瘋狂駕駛,更險與另一部小巴相撞,車上乘客途中拉開車門逃生及報警。警員到場調查期間,小巴司機突發難企圖搶奪警槍,並向警員叉頸襲擊,終被增援的警員合力制服,被捕後綁手腳送院治理。

8. 風筒吹底褲釀打鬥 健身惹禍 動武男子事後摑面自責 (10月18日)

一名69歲老翁在銅鑼灣舒適堡健身中心健身後,不顧公眾衞生,利用風筒吹濕漉漉底褲及腳趾罅,一名42歲男子不滿干涉,老翁卻充耳不聞離去。中年男子不滿對方態度,追出從後箍頸,老翁還以一招「猴子偷桃」,偷襲對方下體,最後雙雙推撞倒地,警員到場拘捕該男子,事後十分懊悔,更激動地當眾自摑面孔自責:「好後悔,我唔應該打阿伯!」,稍後由警員帶返署調查。
 

9. 速遞員上午判感化中午再犯案 獲釋即日在法院偷窺 (12月4日)
承認在女廁偷窺的速遞員,早上在東區裁判法院獲判接受感化18個月後獲釋,竟公然挑戰法紀,中午12時許,隨即埋伏在法院女廁「再度出擊」,被一名女記者在廁格發現,駐庭警員及法院保安人員聞風而至,齊齊在女廁門外守候逮捕疑犯。報警處理。該名速遞員再被警方落案控以一項遊蕩罪。

10. 一女生遭非禮20次  三女同學義憤相助智擒淫看更 (12月6日)
14歲初中女生遭寓所大堂58歲看更非禮逾20次,在保安位後的樓梯口對她上下其手。向母親投訴不獲相信。三名女同學得悉事件後義憤填膺,叫受害少女犯險,再以肉體作誘餌引誘看更再度侵犯,打算趁機拍下罪證。雖然最終同學拍不到任何片段,但決定與看更當面對質。最後通知事主母親報警,警員到場調查後,看更自行招認淫行,

2007年十大新聞


* * * * * * * * 

當你睇到呢段文字嘅時候……

「當你睇到呢段文字嘅時候,我已經到咗機場,將會去一個好遠好遠嘅地方……」這是香港電視劇的一句典型對白。

當你睇到呢段文字嘅時候,
閣下應該是一個好彩或者唔好彩,從不同途徑click到本網誌吧!
或者,閣下觀看其他網誌的內文提及本人名字,因而click到這裡;
所以,我要向「
C+DesertfoxEricHanaJune小C小瓶子巴黎旅客井底蛙自由行佚名素顏天使陳大文渣估聶秀康」(排名先後按筆畫)您們講聲Thank you!

本網誌從2007年3月開始,專寫吓啲無謂無聊、低能白癡嘢。除了我圍內幾個朋友會睇之外,一向都無乜人吼,只是自娛一番。
自今年初開始,我好高興能夠從網誌認識到很多新朋友,我甚至有幸能夠跟某些朋友們親身見面,友誼由虛擬變成真實。

我還要多謝曾經在此處留言的新知舊遇,你們的留言十分精彩絕核抵死!往往令我在辦公室電腦前,忍俊不禁!惹來旁人白眼,我都心甘命抵!

祝大家新一年心身健康!

卡臣敬上

2008年12月27日 星期六

電影 - 2008

日期 戲名 導演

  1. 05/01/08 My Blueberry Nights 藍莓之夜 王家衛
  2. 06/01/08 Aliens vs Predator 2 異獸戰 2 Colin Strause
  3. 11/01/08 Paradise Now 立見天國 Hany Abu-Assad
  4. 21/01/08 Secret 不能說的秘密 周杰倫
  5. 25/01/08 Cloverfield 末世凶煞 Matt Reeves
  6. 27/01/08 School of rock 阿sir嚟自樂人谷 Richard Linklater
  7. 29/01/08 Bad Santa 聖誕有賊 Terry Zwigoff
  8. 07/02/08 CJ7 長江七號 周星馳
  9. 08/02/08 Beauty & The 7 Beasts 七擒七縱七色狼 鍾晴
  10. 10/02/08 Mad detective 神探 杜琪峰
  11. 11/02/08 Typhoon 颱風 郭璟澤
  12. 12/02/08 L Change the World L 之終章‧最後的23天 中田秀夫
  13. 13/02/08 Sweeney Todd: The Demon Barber of Fleet Street 魔街理髮師 Tim Burton
  14. 20/02/08 I am Legand 魔間傳奇 Francis Lawrence
  15. 21/02/08 Jumper 越空行者 Doug Liman
  16. 22/02/08 Hinokio 我愛奇諾奧 秋山貴彥2
  17. 3/02/08 I'm cyborg but that's OK 再造人之戀 朴贊郁
  18. 24/02/08 Nana 2 Nana 2 大谷健太郎
  19. 25/02/08 Vantage Point 絕點輯兇 Pete Travis
  20. 27/02/08 No country for old men 二百萬奪命奇案 Joel and Ethan Coen
  21. 28/02/08 There will be blood 黑金風雲 Paul Thomas Anderson
  22. 29/02/08 Juno Juno少女孕記 Jason Reitman
  23. 02/03/08 Meet The Spartans 賤狼300 Aaron Seltzer
  24. 03/03/08 Trivial Matters 破事兒 彭浩翔
  25. 04/03/08 Sukiyaki Western Django 日式牛仔一品窩 三池祟史
  26. 05/03/08 John Rambo Rambo熱血回歸 Sylvester Stallon
  27. 06/03/08 The Transporter 換命速遞 Cory Yuen
  28. 07/03/08 The Transporter 2 換命速遞 2 Louis Leterrier
  29. 15/03/08 Heors Season 2 美劇
  30. 19/03/08 Cassandra's dream: crimes and misdemeanors 迷失罪與罰 Woody Allen
  31. 21/03/08 Help Me Eros 愛神幫幫我 李康生
  32. 22/03/08 Michael Clayton 敵對關係 Tony Gilroy
  33. 24/03/08 The Warlands 投名狀 陳可辛
  34. 26/03/08 Heros Season 2 美劇
  35. 27/03/08 The way we were 天水圍的日與夜 許鞍華
  36. 01/04/08 Charlie Wilson's war 韋氏風雲 Mike Nichols
  37. 02/04/08 Love is not all around 十分愛 葉念琛
  38. 13/04/08 The Pye Dog 野良犬 郭子健
  39. 04/05/08 LOST Season 4 美劇
  40. 12/05/08 Iron Man 鐵甲奇俠 Jon Favreau
  41. 12/05/08 Speed Racer 極速賽車手 Larry and Andy Wachowski
  42. 17/05/08 Dragon Tiger Gate 龍虎門 葉偉信
  43. 18/05/08 Be Kind Rewind 低清老翻王 Michael Gondry
  44. 22/05/08 Indiana Jones and The Kingdom of The Crystal Skull 奪寶奇兵之水晶骷髏國 Stevem Spielberg
  45. 05/06/08 Zodiac 殺迷藏 David Fincher
  46. 12/06/08 The Happening 破天.慌 M. Night Shyamalan
  47. 18/06/08 The Incredible Hulk 新變形俠醫 Louis Leterrier
  48. 21/06/08 The Sparrow 文雀 杜琪峰
  49. 05/07/08 Hancock 街頭超人 Peter Berg
  50. 05/07/08 Sunshine 太陽倒數 Danny Boyle
  51. 16/07/08 Kung Fu Panda 功夫熊貓 John Stevenson
  52. 21/07/08 The Good German 柏林暗戰 Steven Soderbergh
  53. 22/07/08 Red Cliff 赤壁 吳宇森
  54. 26/07/08 Wall.E 太空奇兵 威E Andrew Stanton
  55. 28/07/08 Batman The Dark Knight 蝙蝠俠.黑夜之神 Christopher Nolan
  56. 02/08/08 Mummy 3 Tomb of The Dragon Emperor 盜墓迷城 3 Rob Cohen
  57. 06/08/08 The Mist 霧地異煞 Frank Darabont
  58. 06/08/08 L for Love, L for Lie 我的最愛 葉念琛
  59. 06/08/08 Triangle 鐵三角 徐克、杜琪峰、林嶺東
  60. 11/08/08 Curiosity Kills the Cat 好奇害死貓 張一白
  61. 12/08/08 Men Suddenly in Black 2 大丈夫2 鍾晴
  62. 15/08/08 The Brave One 強復者 Neil Jordan
  63. 24/08/08 Star Wars: The Clone Wars 星球大戰 : 複製戰紀 Dave Filoni
  64. 05/09/08 黃子華棟篤笑 - 兒童不宜
  65. 29/09/08 Eagle Eye 鷹眼追擊 D.J. Caruso
  66. 01/10/08 Getting Home 落葉歸根 張揚
  67. 05/10/08 Twentieth Century Boys 20世紀少年 堤幸彥
  68. 21/10/08 Vicky Christina Bracelona 情迷巴塞隆拉 Woody Allen
  69. 28/10/08 We own the night 黑夜話事人 James Gray
  70. 30/10/08 Tropic Thunder 雷霆喪星 Ben Stiller
  71. 03/11/08 30mething…QK 林海峰...是但求其大合唱
  72. 07/11/08 La Vie En Rose 粉紅色的一生 Oliver Dahan
  73. 08/11/08 Cape No 7 海角七號 魏德聖
  74. 09/11/08 Detroit Metal City 爆粗band友 李闘士男
  75. 20/11/08 Burn after Reading CIA光碟離奇失竊案 Joel Coen Ethan Coen
  76. 21/11/08 Wanted 殺神特工 Timur Bekmambetov
  77. 12/12/08 The Day the Earth Stood Still 地球停轉日 Scott Derrickson
  78. 26/12/08 Suspect X 神探伽俐略 西谷弘

2008年12月25日 星期四

聖誕交叉扑 - 祝福婚禮 By CK

聖誕交叉扑 - 祝福婚禮 By 人在中環CK

「離鬼譜架真係…」我心裡暗暗咒罵:「邊有人揀平安夜結婚架,搞到一個二個局住黎飲冇得蒲!」

平安夜既夜晚,我身穿整齊既西裝,出席我老友victor同joey既婚宴。victor同joey係我大學認識既同學,大學生涯裡面,如果冇左佢地兩個陪我溫書,我可能根本畢唔到業。我認識victor既時候,佢正係瘋狂咁追求緊joey。joey係個一等一既靚女,追求者眾。不過victor當年的確毅力驚人,苦等joey好幾年,後來joey終於被victor既持久等待所感動,佢地兩個終於成為左一對。一對我一直認為係金銅玉女既組合。

* * * * * * * * * *

一年前,蘭桂坊。

「喂,果個咪victor?」拖住我既老婆忽然猛力搖我手臂:「佢拖住果個邊個黎架?」
我抬頭望一望,咦,真係victor喎!至於佢拖住果個,我唔清楚,我淨係知道,果個女仔一定唔係joey。

「頂,洗唔洗邊行邊打車輪呀…」

我本來想衝前去拍victor膊頭,卻被身邊既老婆拉住。

joey、victor,兩個都係我少數稱得上「老友」既人,同我感情非淺。而我亦一直以為,victor同joey關係美滿,victor俾我既印像亦一直係個專一既男朋友。眼前呢個景象,的確令我好唔舒服。

事後我私底下搵過victor,問佢我當日響老蘭見到既事。victor向我親口承認左,同joey既感情,變得越黎越淡如水。大家雖然經歷左好多,有深厚既感情,但係彼此間既愛情卻消失左。相處變得淡如水。佢又話只係一時意亂情迷,加上酒精影響,先至做錯左事。果個女仔,佢話當晚響酒吧認識既,唔會有手尾跟,亦唔會影響佢同joey既關係,one night stand,過左就算數。

「千祈唔好同joey講呀…」victor求我。

我心面有點氣,只是一向唔懂得推人既我,無奈地應承左佢。

往後既日子,victor同joey一pair,我同我老婆一pair仍然時不時咁一齊出黎玩。victor一直表現得若無其事,響我兩公婆面前,仲表現得好甜蜜好恩愛。我心裡面總覺得有d唔妥,不過又唔敢表現出黎。我心裡面一直相信,victor當日同我講既說話係真既,當日只係一時意亂情迷,一時。

* * * * * * * * * *

大約六個月後,我又響街上碰見victor。

victor拖住同一個女仔,行左入時鐘酒店。

同。一。個。女。仔。

即係當晚唔係one night stand,而係一個持續既關係。

我忍唔住即刻call victor手提:「你條仆街有冇搞x錯呀?你對得住joey嘛?」

「喂,你響邊呀?」電話裡面既victor心急如焚:「喂,你冷靜d,千祈唔好同joey講呀…」

「仲要我信你?」我忍唔住大叫,然後將電話掛斷。

當晚深夜,我同老婆提及我今日見到既事,正係豫疑緊係唔係應該同joey講出我見到既野時,我既手提電話突然收到joey既來電。

我心裡一沉,心諗victor係咪已經自首?

「我係joey呀!」電話裡面傳黎joey興奮既聲音:「victor同我求婚呀!我地決定年尾結婚呀,我一應承左,就想打電話俾你地兩公婆啦!」

效率真快,我心諗。

呢一晚,我有一種被好朋友欺騙既感覺。

* * * * * * * * * *

婚禮上,我既角式,係一個鄧穿石。

一個不能真心戥一對新人高興既鄧穿石。

我整晚心不在焉,我去過好多好多婚禮,亦都做過好多次伴郎、兄弟既工作。今次,係其中一次感覺最差既experience。

晚上既婚宴,嘉賓陸續入場。一對新人依然表現甜蜜。來賓都先後上台同一對新人影相。

後來有一個樣貌幾標緻既女孩子,一上台就同joey黎左個擁抱,然之後撬住joey既手臂,親蜜地合照。

我拉一拉身邊既老婆衫袖:「認得佢嗎?」

當日victor響老蘭拖住,之後一齊入時鐘酒店既女仔,就係佢啦。

原來係joey既friend黎。

我望住眼前呢個女仔同joey親蜜既朋友舉動,再望望響佢地身邊,victor果一副神態自若既模樣,突然覺得好心寒。

我拖緊身邊既老婆,深深吸了一啖氣。

「你能夠真心祝福呢對新人嗎?」




.....................

帶妳見我父母吖! By卡臣

(Photo by Milo Boggy)

Kevin從加拿大回流,在香港一間銀行工作。
他的父母留在溫哥華居住。
每年聖誕節,Kevin也會回溫哥華跟父母歡渡聖誕節,
Kevin已屆適婚年齡,恨飲新抱茶的父母,著Kevin帶女朋友回家給他們過目。
Kevin唯唯諾諾,12月帶女朋友去攝氏零度的溫哥華渡冬假。

Kevin帶著女朋友,由機場返家,母親正在家中準備豐富晚餐替他們洗塵。
Kevin按門鈴,父母殷切開門,女朋友首次拜見Kevin父母。

媽媽見女友後,面色一沉:「Kevin,你入一入嚟廚房幫幫我手吖!」
Kevin入廚房後:「媽,點呀?幫手整火雞呀?」
媽媽:「哼!你女友咁醜樣,你唔飛咗佢,唔好認我做阿媽!」
Kevin最鍚父母,唯命是從,回港後,不久就甩了這女友。

半年後,找到一個更靚更索的model女友,12月又帶新女朋友去溫哥華見父母。
今次Kevin充滿信心,希望媽媽會鐘意呢位模特兒女友啦!

怎料媽媽見新女友後,面色一沉:「Kevin,你入一入嚟廚房幫我手吖!」
Kevin入廚房後:「點呀?呢個OK囉呱?」
媽媽:「哼!你新女友咁醜樣,你唔飛咗佢,唔好認我做阿媽!」
Kevin雖然失望,但他最聽父母的話,回港後,不久就甩了這新女友。

Kevin極度氣餒,不知道什麼女友才可以取悅到父母?
Kevin的同事Carlson獻計教路:「嗱!Kevin,你一於根據你媽媽年輕個樣,揾個女友同你阿媽一模一樣,信我!你阿媽一定唔會詐型!」
Kevin照板煮碗,又竟然俾佢咁好彩喺人海之中,
揾到一個跟媽媽年輕時一模一樣的女友。

12月,Kevin帶最新女友去溫哥華見父母。
Kevin今次真的充滿信心,媽媽一定會鐘意呢位新女友!

不出所料,媽媽一見這位新女友,面色大悅,當場大讚:「Kevin,你呢位女朋友真係fabulous!」繼續好開心咁仔細打量這位未來新抱。

此時,父親叫:「Kevin,你入一入嚟車房幫幫我手吖!」
Kevin入車房後:「爸,點呀?剷雪機又壞咗呀?」
父親:「哼!你新女友咁醜樣,你唔飛咗佢,唔好認我做阿爸!」
Kevin:「吓……?」




--------------------------------------------

很高興能夠與Blog界名人:人在中環CK 交叉Blog,本人十分榮幸!

更要多謝大鐵鎚發起今次活動出心出力。

英國聖誕電影《Love Actually》全名:Love Actually All Around.
如果愛一早已經包圍著我們,只是我哋一時間唔察覺或者唔為意,
咁我祝大家:
Many Kiss Must

2008年12月19日 星期五

前度.再度

前度.再度

晚上10時,阿康掛上電話,怱怱換衫出門口,趕到屋企樓下,跳上一部Taxi,直奔Derek於太子區的住所。

20分鐘後,抵達Derek住的大廈,Derek早已焦急地站在大廈門口等候,見到阿康下車,他立即走上前;緊握阿康雙手。

* * * * * * * * *

阿康和Derek於今年情人節前分手,轉眼已經十個月。Derek結識了新男友,向阿康提出分手,結束這段兩年的感情。Derek的新男友在保險公司當星級agent,收入豐厚、有樓有車,是Derek的Sugar Daddy。

雖然阿康苦苦哀求,但仍留不住鐵起心腸、去意已決的Derek。分手後,阿康一心想跟Derek保持普通朋友的關係,無奈一心疊埋心水想退休歎世界的Derek,唔覆阿康電話,迴避直至消聲匿跡。

這次打擊,阿康雖然傷得很重,但他亦知情識趣,不再苦苦痴纏Derek。這十個月來,阿康完全跟Derek失去聯絡,他漸漸從情傷中康復過來。

估不到在12月19日晚上,阿康正在家中看電視之際,晚上10時,電話響起,原來是Derek打來。Derek的聲音,又牽動了阿康已經撫平的舊傷口。阿康聽電話後,二話不說,立即趕去見Derek。

* * * * * * * * *

滿面焦急的Derek一見到阿康,立即走上前,緊握阿康雙手。北風呼呼的晚上,Derek的手份外冰凍。
阿康:「點呀?幾時唔見?佢通常去開邊度呀?」
Derek:「我今晚9點返到嚟,已經唔見咗佢,佢又無帶電話!揾唔到佢!」
Derek跟患上老人癡呆症的媽媽同住,自父親去世後,獨子Derek便負起照顧母親的責任。
今夜母親突然失蹤,未夠24小時未能報警,而男友正在外國開會,剩下Derek一人,徬徨無助。

Derek一時情急,只好硬著頭皮,找前度阿康來幫手。阿康不理前嫌,兩人立即在附近一帶,兜截尋找伯母。

一邊找,Derek突然問阿康:「你……而家……有冇拍拖呀?」
阿康:「……有!今年7月識嘅!佢係消防員!」
Derek:「哦~……咁咪……幾好吖~」
阿康:「咁你男友對你好嘛?」
Derek:「佢……幾錫我吖!」
阿康:「哦~……咁咪……幾好吖!」

找了一小時,已經11:30分,仍然未尋回伯母,Derek的手提電話突然響起,他見來電顯示,連忙接聽,一天光哂!母親已回家,並致電找Derek,原來母親今夜去天水圍姨婆家吃飯,不過忘記告訴Derek而已。母親見快將凌晨,Derek仍未回家,於是call Derek。

阿康:「好啦!無事就好!我送你返屋企!」
兩人沿著街燈,步行回家,阿康很久未重溫過這滋味。沿途兩人簡單地交換近況。
Derek:「到啦!多謝你今晚肯嚟幫我手!」
阿康:「乜說話吖!唔……早抖啦!」

當阿康正想轉身離開之際,Derek突然用手托著阿康的臉頰,趁夜闌人靜、街角幽暗,四周無人,Derek嘴對嘴吻下去。阿康在沒有心理準備之下,嚇了一跳!欣然接受他一吻。
阿康估Derek以吻作謝禮,無理由拒絕,還可以重溫往日之餘溫。親吻後,Derek一笑後,走回大廈。剩下阿康百般滋味在心頭。

阿康獨自行去地鐵站,趕乘尾班車。
「嘟~嘟~」阿康電話收到Derek發出的文字短訊:
「我想對你說聲對不起,因為今夜我講了兩個大話:第一:其實我媽媽沒有失蹤,她一直安在家中,第二:我和男友因性格不合,已於上個月分手。
我說謊騙你出來陪我渡過我生日的晚上。我怕你仍嬲我以前太過自私,我知道我用這個藉口;你一定會出來見我,多謝你!很高興你仍著緊我!往年你總會給我birthday kiss,今年在我生日臨結束前五分鐘,總算收到你的birthday kiss,我們可以再重頭開始嗎?」

阿康這時才猛然醒起今天就是Derek生辰,他雖然被騙,但沒有激動氣憤。其實仍是單身的阿康,根本就沒有什麼消防員新男友,不過阿康不甘在Derek面前示弱,情急地隨口說另結新歡而已。如今Derek有心從拾舊好,讓阿康正中下懷。

阿康重讀Derek的短訊後,思前想後,兩分鐘後回覆一條短訊給Derek:
「對不起,我新男友待我很好,我不想辜負他,我們已經完了!」
Sent完短訊後,阿康舒懷地微笑。因為阿康知道他這樣做,才是醫治自己傷口的最佳最徹底的方法。

阿康深深吸一口冰涼的空氣,仰望寒夜星空,用舌頭輕舔剛才Derek吻過自己的嘴唇,最後一次重溫那份早已逝去的旖旎。

送給歪歪



文字靈感取自譚詠麟的《凌晨一吻》:

凌晨一吻 – 譚詠麟
作曲﹕HIDEMI YAMAMOTO
作詞﹕盧永強

明月夜 沉靜夜
地面怎麼顯得傾斜
斜向你使我向你走去
再訪當初深愛者

重聚夜 流淚夜
面對呼呼北風荒野
你說你今天愛已失去
昨天即使傷我心
棲身盼我暫借

我看著舊情人 茫然無奈地說
我心已屬別人
看你默默弄長裙 抬頭垂淚地說
叫我無謂擔心

一息間 相擁一吻
含淚說再見最後在凌晨
一息間 深深一吻
忘掉昨日我恨你
凝望背後你尚有淚印
一息間 相擁一吻
含淚說再見最後在凌晨

一息間 深深一吻
忘掉昨日我恨你
懷念最後帶淚那一吻

-------------------------------------------------------------

歪歪回應:

真係唔知要講幾多次多謝先夠。其實我今朝睇完,感動到我眼濕濕之餘,仲令我有千言萬語,但又唔知點講嘅複雜感覺。我需要組織一下先敢留言。

非常鍾意你嘅故事!我亦終於明白點解你之前咁隱晦喇,原來呢個故事既可以係happy ending(阿康已經move on),亦都可以係sad ending (Derek最後醒覺想重修舊好,但被拒絕),果然不愧為我偶像!

希望我會藉着你呢個故事學習阿康嘅瀟灑撇脫,亦會經常警惕自己千祈唔好學Derek,要珍惜眼前人。再一次多謝你呢份咁有心嘅禮物。

2008年12月16日 星期二

負心人の條件

負心人の條件 

「大隻文」接過一份表格,是警察宿舍的調遷申請表。
他在雜差房內,正填寫申請文件,
填到一半,有人叫:「大隻文,份驗屍報告到咗喇!」
大隻文只好把申請表放入袋中,繼續手頭上的工作。

* * * * * * * * *

1993年,仍是英國殖民地的香港,大隻文是CID,駐守北角區。已婚未有孩子的大隻文,跟太太住在警察宿舍內的7A單位。大隻文需要輪班工作,太太叫美芬,當OL,工作時間穩定。
有時大隻文通宵工作後回家,美芬剛好更衣離家上班去。

1993年9月3日深夜2時,大隻文在警局當夜班時,突然發冷發熱,
大隻文的隊目叫「東叔」,東叔說今夜無乜特別急趕事情,隻眼開隻眼閉,叫大隻文不如回家休息吧。
大隻文原本想打電話通知美芬,但已經零晨2:30,不想弄醒睡夢中的美芬。
當大隻文返回宿舍單位時,用鎖匙打不開鐵閘,原來美芬拉了門栓,一定要由屋內的人才能把門打開。
逼於無奈,大隻文致電美芬,聽到大門內電話響起,無奈也弄不醒睡房中酣睡的太太。
大隻文聽到7B單位門內有電視聲,推想7B屋內的人未睡,硬著頭皮去按門鐘,
7B單位姓張,張太太應門,張先生也是駐守北角區,隸屬另一組隊,今夜要返通宵更。
大隻文向張太太解釋事情經過後,想入7B的睡房,因從7B睡房的窗,可以直接望到7A睡房的窗,大隻文想在7B窗口嗌醒美芬,無奈7A睡房拉了窗簾,瞓到如死豬的美芬,任由大隻文點嗌也沒有半點反應。

無功而退的大隻文,向張太太告辭,張太太看得出大隻文抱恙,面青口唇白。
她靦腆地說:「如果唔介意,咪......留喺廳到休息,聽朝瞓先返過番去啦!」
大隻文實在太辛苦,點頭同意,這夜,男睡在沙發,女睡在睡床,一夜無話。

「咔」一聲,鐵閘打開,黎明時分,張先生入到門口,見到大隻文在自己客廳內瞓,張先生打了一個突!
大隻文被驚醒,連忙將事情一五一十向張先生解釋清楚。
大隻文回7A後,向正在梳洗的太太投訴:為何昨夜咁「爛瞓」?!太太表示因為昨夜吃了感冒藥,才會睡至不醒人事。
其實大隻文沒有真正很憤怒,因為張太太雖然三十出頭,仍有散發出東瀛少女的氣味,
昨夜大隻文在夢境中,曾有僭入張太太房間的遐想。

大隻文在雜差房內,望著英女皇的肖像,內心爭扎一番後,最後做了一個重大決定。
大隻文在差館的「更表」上,Check到張先生今個星期三晚需要返通宵班。
這個星期三,剛好是大隻文的補假。

星期三早上,大隻文騙美芬說:「我今晚要開通宵。」
當晚11點,大隻文假裝上班離家,先在遊戲機中心消磨了3小時後,深夜2時,他到達7B單位,按張太太的門鐘,大隻文知道張先生在差館工作。
張太太應門,大隻文藉詞太太美芬又拉了門栓,有家歸不得。
張太太招呼大隻文入到屋內坐,既然無門口入,不如又借宿一宵。

張太太正在廳中看VHS錄影帶,是「天若有情」,她邀請大隻文坐在沙發上一齊觀看。結果五分鐘後,當劉德華親吻吳倩蓮時,大隻文採取主動,轉身吻張太太,有時夜深人靜,孤伶伶一個女人總會感到寂寞難耐。
她半推半就之下,跟大隻文在沙發上發生關係。
第二朝黎明,大隻文趕在張先生下班回家前,返回7A單位。
自此之後,大隻文和張太太發展婚外情,大隻文好幾次照板煮碗到7B跟張太太偷情。

大隻文對於未得到的東西,日思夜想,一旦得到之後,既然心願已償,就想「趙完鬆」。始終怕「上得山多終遇虎」,東窗事發。
自己嚐過婚外情的滋味後,應該是時候浪子回頭。
結果大隻文對着關公神位上香,下定決心,申請宿舍調遷,終止這段不倫關係。

這夜,他袋好了填咗一半的「宿舍調遷表格」到7B單位,心想跟張太太鬼混完最後這一次。
黎明時分,大隻文在防盜鏡向門外先探視一番,見外面無人後,立即離開7B。
因為「此地無銀」的心理作祟,大隻文步出7B門口立即左轉,在7樓走廊兜一大圈後,才步回7A單位。免得7B的閂門聲和7A的開門聲,兩次門聲相距得太接近。

當大隻文就快回到7A門前,見到7A的鐵閘正在打開,
咦?!美芬應該無咁早出門口果喎!
大隻文立即躲在牆後,竟然見到張先生從7A單位步出,向走廊左面轉,先兜一大圈,跟自己的做法一模一樣。

大隻文見到這一幕,十分震驚!原來「剃人頭者人亦剃其頭」!
大隻文返回7A門前,拿出鎖匙扮開門,靜心等待張先生的折返。
兩人終於在單位門前再碰頭,張先生有點突然:「呀......早晨!」大隻文:「早晨!咁啱呀!」
大隻文從警察學堂上學到的偵探邏輯,從張先生的眼神中得到一個推斷:

美芬紅杏出牆,一早已經和張先生有一腿。
1993年9月3日零晨,張先生趁大隻文返夜班,到7A跟美芬鬼混。
怎料大隻文生病,於零晨2時30分,突然返回7A,殺個美芬措手不及!
美芬知道她絕對不能開門,只好扮服感冒藥後睡到天昏地暗,張先生稍後安全地逃離7A。結果這一次,意外地造就了大隻文和張太太。

* * * * * * *

大隻文開門入到7A,見美芬剛好起床,他沒有憤怒,
畢竟自己也是「其身不正,問心有愧」。
自嘆誤打誤撞地玩了「換妻遊戲」。
兩對夫妻誤墜進四角關係。

美芬在廁所梳洗完,走出來指著門口一袋舊報紙雜誌,
叫大隻文瞓醒後,拿這袋廢紙去宿舍的廢紙回收筒,
大隻文點頭,順手把自己袋中的「宿舍調遷表格」放進舊報紙中,一併掉棄。
他改變了初衷,決定繼續留在7A單位。

他打算在瞓覺前,先去茶餐廳吃一頓豐富的特級早餐,
當是自我救贖後的小型慶祝,
他曾經誤以為自己背負了髮妻美芬,
原來做「負心人」,也需要講資格條件和先後次序。

美芬出門口上班時,大隻文向太太講聲拜拜,
兩人互相向對方作出一個神秘的微笑。


送給陳大文



空中少爺的玩具


空中少爺的玩具

穿著機艙服務員制服的Alex,
站在機艙入口,向每位登機的乘客打招呼。
最後一位乘客登機後,Alex始終見不到「她」的踪影,
暗自失望地嘆氣。收拾心情,投入工作。

* * * * * * *

三年前Alex大學畢業,他到航空公司申請當「機艙服務員」,
因為他想趁年輕到世界各處免費旅行,擴闊自己眼界。
機艙服務員正好給予他這個機會。
Alex憑他俊俏外型和六尺身高,順利被航空公司取錄。
驗身合格後,接受為期一個月的訓練。

在受訓期間,一大班年輕男女上堂之餘,留意班中有無心儀對像。
如像「日本單身男女配對」的電視遊戲節目,
Alex看上了班中樣子甜美的Helena,
除了Alex外,班中亦有很多男同事暗戀Helena。
但眼角高的Helena,暫時未有人能令她心動,保持單身狀態。
Alex雖未能獲得Helena的芳心,不過總算能夠跟Helena的距離拉近,
Alex和Helena同行交談的機會,較其他的競爭者為多。

訓練完畢後,Alex的處女航是由香港飛去台灣。
咁啱得咁蹺,Alex、Helena和另外三位同班同事,
都被安排在這班航機,首次投入服務。Alex知道可以跟Helena同機,十分興奮!
希望可以跟她下班後,單獨約她到台北101晚飯,
站在台北璀璨夜色前,向Helena示愛!一定馬到功成!
想到這裡,在機艙工作中的Alex,不其然傻笑起來!
被旁邊的同事Philip拍醒:「笑咩呀?派緊餐架!」

在機艙中工作的Alex,跟Helena一有eye contact,
Alex就報以微笑,Helena亦以微笑回應,
Alex直覺今夜應該可以跟她有突破性的進展,
雖然他仍未開口約會Helena。

飛機抵達桃園機場,艙務員下機等候酒店巴士時,
Alex拉Helena埋一邊細細聲密密斟。
Alex想約她今晚吃飯,Helena因為身體不適,拒絕了他的邀請。
Alex雖然失望,但扮有風度,叮囑她好好休息後,微笑行開。

當夜,艙務員入住台北飯店,Philip和Alex被編同一間房間,
晚上8時,Philip問Alex:「今晚大伙兒去吃鼎泰豐!」
Alex答:「唔使預我,我約咗人!」
Alex有一位香港朋友在台北工作,這夜相約聚舊。

翌日一早,艙務員離開酒店到機場,在一班早機內服務。
Alex在酒店大堂等候公司巴士時,見到Helena,上前問候她身體。
隨便交談幾句,講吓他自已昨夜去了什麼地方?吃了什麼?

抵達機場後,一班艙務員經的「工作人員通道」進入機場禁區,
Alex和Helena一邊傾偈一邊行,感到一份虛榮感。
當Alex的行李喼經過X-ray檢查機時,閃燈顯示,需要Alex打開的行李喼進行檢查。Alex很驚奇,因為公司培訓時,他已經清楚什麼東西是不可攜帶上機。

檢查員叫Alex打開行李喼,Alex合作地打開,
檢查員翻出一個「電動的假陽具自慰器」,仲唔覺意啟動咗,假陽具在喼中央「嗤嗤聲咁轉轉吓」!
一名在旁的女艙務員目睹:「嘩!哈哈!」大聲爆笑!
Alex立即面部通紅,用國語向檢查員說:「這個不是我的!」
唉!這個情景,什麼解釋只當作掩飾!無人會相信Alex是清白的!
Alex只想找個窿躲進去!登機之後,全程再不敢跟Helena有任何眼神接觸。

好事不出門,醜事傳千里!全間公司都談論這名「電具男」;
Alex只覺瘀到爆,解釋又無人願聽,大感無癮,自動辭職。

Philip知道Alex辭職後,心裡暗自拍掌叫好!
受訓時Philip一早已是Helena的裙下之臣,在機艙內見Alex和Helena眉來眼去,
心中已經不悅,抵達台北後,目睹Alex拉Helena到一邊密斟,
當晚, Alex向Philip說約了人吃飯,而大伙兒吃飯時Helena因病沒有出現,
令Philip聯想到Alex 跟Helena單獨約會。

妒嫉心燃燒!Philip決定要令Alex當眾出醜!當夜在台北的性商店買了一件「陽具自慰器」和一把又長又尖的指甲挫,
翌日早上,Philip趁Alex在洗手間梳洗時,把「贓物」放進Alex的行李喼一角。
結果機場X-ray檢查員照到那柄「鋒利的指甲挫」而要求Alex開喼檢查。換來一隻死貓和一場擾攘!

Alex曾經懷疑過是同房Philip插贓嫁禍,但當天早上Alex在酒店大堂等候巴士時,跟Helena談天,曾經把自己行李喼留在一旁,所以任何人也有可疑。

Alex轉投另一航空公司當艙務員,兩年後晉升到商務艙務員。
七月某一天,Alex在一班飛住美國的航機機艙內,竟然給他再遇上Helena。
Helena兩年前因緣際會從商,仲做到一番好成績,身居要職,她要去美國參加商品展銷會,她的下屬坐在經濟客位,自己坐在商務客位,整定Alex可以再見她。

Alex想起兩年前的尷尬事,又覺得Helena是商務乘客、自己只是服務員,身份變了。Alex打了聲招呼後,便靦腆行開,
Alex更跟同事對調位置,不再行近Helena那排乘客座位。Helena看在眼裡,明白Alex心裡留下的陰影。

18小時後,飛機抵達紐約機場,艙務員排列站在機艙出口,向乘客說再見。
Alex知道他始終要面對Helena多一次。
Helena走到Alex面前,細細聲好誠懇咁講:「其實我屋企都有你嗰啲玩具架!」
跟著一個神秘的微笑後,回頭轉身踏步走,離開機艙。

Alex想追上去,無奈Supervisor在旁,不能擅離職守,目送Helena消失於人潮中。Alex心中三年來的陰霾,被Helena一句說話一掃而空!
想找回Helena,但她電話號碼已改,她又無登記facebook,
Alex甚至向航空公司票務部追查,當然有私隱條例保障。

其實Helena家裡那會有自慰器!她相信這樣講可以消除Alex的心裡包伏。
雖然Alex想再遇上Helena,但Helena在香港已有一名有頭有面的富商男朋友,
兩袖清風的Alex又怎可跟富商匹敵?

* * * * * * *

Alex以後每一程飛機,都希望可以再遇上Helena。
說不定Helena已經轉選搭另一間航空公司更舒適的頭等客位,
但不知情的Alex仍然心存希望,
做人有希望,總好比無希望而活得好吧!

送給 Hana

2008年12月13日 星期六

古樹悲歌

古樹悲歌

「霹啪」一聲巨響,公園內一棵古樹的半邊支幹,在毫無先兆之下,從三米高倒塌下來。坐在樹下石屎基躉的一名乘涼老翁,慘遭樹幹壓倒,送院途中證實不冶。康文署又遭民間炮轟,馬上派工人把古樹欄腰鋸斷,消除任何潛在危機。

表面上是一單「古樹枯萎」而釀成的意外,翌日做了幾份報紙的頭條。但看在「球叔」的眼裡,事件卻是疑點重重。

球叔是這個公園的外判清潔工人,每天早上8時至黃昏6時都在公園內工作。自兩星期前,他留意到:每一天傍晚5:45分,有一位30多歲的四眼男士, 必會準時來到公園這棵古樹下,獨自一人坐下。

憑衣著外表,四眼男士應該是當藍領;他每次必會攜著一支青島啤酒;坐了10分鐘後,即5:55分,四眼男士便會連同啤酒樽一併離開公園。這名四眼男士的規律性行為,兩個星期來,每天如是,風雨不改。但自古樹倒塌後,這名四眼男士便再沒有來過這公園,從此銷聲匿跡。

球叔最初以為發生意外後,四眼男士不會再來這公園坐,因為心理恐懼,害怕會遇上倒樹意外,這是一件十分合情理的事情。

但意外發生後第二晚,球叔下班後在公園附近重遇這名四眼男士,四眼男士再沒有拿著啤酒樽,而是拿著一支可樂,大口大口往嘴裡灌。球叔直覺這位四眼男士應該是不愛喝啤酒,而且記憶中他到公園坐,啤酒樽只是一直放在身邊,半滴啤酒也沒有喝過! 為什麼他連續兩星期攜同啤酒樽到古樹旁坐10分鐘呢?球叔覺得古樹倒塌,跟這名連續兩星期到訪公園的四眼男士有關。

球叔跟工頭透露這個想法,不過工頭只回應:「球叔,你無病吖?!出返去做嘢喇!」
兩天後,康文署專家公佈,古樹不是遭白蟻蠶食,而是遭化學毒素所害死。換言之,古樹倒塌事件不是天災,是人禍!

工頭立即邀功,向上司報告有一名四眼可疑人物,懷疑他下毒。球叔被邀請到警署提供四眼男士的人物拼圖。

12小時後,藍帽子在公園附近截停一名四眼可疑人物,帶返警署協助調查。四眼男士在差館內,口震震咁認咗罪。

原來四眼男士在附近一間化工原料工廠工作。每天下班,他在工廠用啤酒樽裝滿化工原料,到公園古樹旁,把啤酒樽放在身邊,趁旁人不覺之際,將啤酒樽翻側,把化工毒素搗入石屎基內的樹根。

每天如是,不消兩星期,古樹半邊已變壞呈枯黃色,但公園管理員一時疏忽,沒有加以理會。終於在某個中午,古樹頹然倒下,誤殺一名老翁。

四眼男士承認毒樹,但他確實沒有想過自己會誤殺老翁,他知道有人死傷後,受到良心自我責備,十分後悔,向警方和盤托出。

警方下一條問題:「你向樹落毒的動機是什麼?」針對康文署?抗議政府官僚?不滿金融海嘯?反環保?跟老翁有仇?你是精神病患者?

四眼男士垂下頭,承認三周前跟女朋友分手,她是工廠同事,以前,他們下班後,會到工廠附近的這個公園坐下聊天。某一夜,他們趁四周無人,用刀在樹幹上刻著「林永樹愛香芍茹一萬年!」 如今分手後,林永樹不忍再目睹這個傷心的樹上烙印,決定誓要消滅它!

用斧頭砍,砍一晚都砍唔斷棵樹,太慢啦!
用電鋸鋸,又嫌太嘈,落手時一定會驚動其他人!
用刀刮走樹皮,可惜無人睇水,驚俾人揭發!(以前是香芍茹睇水,林永樹落刀)
結果他決定用化工原料,兩周前開始,向樹慢性落毒。最後得償所願,兩周後康文署將古樹鋸斷,傷心烙印便從此蒸發。但林永樹亦需要付上代價,接受法庭的審判。

林永樹獲得法律制裁後,球叔在朋友們前誇耀自己擁有偵探頭腦,不過球叔更領悟出一個道理:要清洗一段已經逝去的感情記憶,代價竟然要賠上一條寶貴性命;代價實在太驚人!難怪有人說愛情是充滿毀滅性。

話雖如此,球叔仍然相信愛情,球叔下週又和他的女人出發到內地名山大澤旅行,在大陸旅遊,每當他見到參天巨木時,他都不其然想起林永樹被判罪時的無奈眼神、手心便不其然,更加緊握身邊女人的纖手。


送給劉朗

-----------------------------------

劉朗回應:

卡卡:

愛之欲其生,失之欲其死!感情的乖異力量真的可以很鉅大!

要毁樹滅跡,林永樹之名又是一個恰巧的反諷。球叔嗎?從來珍惜,惟要去的便讓它去了,如半年前消逝的那段,沒有不捨,沒有痴纏,沒有怨懟。

如今之夢,在祖國的名山大澤執著她的纖手,也是悠悠我思!當然要向你說聲謝啊,卡卡!

* * * * *

分手真相 - 郭小霖
作曲:郭小霖
填詞:小美

霧裡的街燈 被夜雨無言輕吻
而平添傷感氣分 是我不甘心
為你仍然抖震 開始恐懼 零晨時分
過去你說 愛夜靜浪漫 披清風
深宵給我輕吻 記印

但你一聲不響 愛漸退無言飛縱
而寒風心裡播送 沒有冷暖四季
我似是全年冰凍 想起當日 誰曾玩弄

你那笑熊 腦裡邊日夕活動 一邊想一邊心痛

雨灑下 夜裡更覺滄涼 為誰癡心始終相向
誰叫每個夜格外漫長 是誰的心早更改方向
是誰分手總不知真相

長夜漫漫 冰冷滲透 霧裡街燈有否跟你碰上
無盡寂寞 心裡滲透 暗倒影彷彿勸我
淡忘她 淡忘她 淡忘她

2008年12月10日 星期三

變型俠醫候群症

變型俠醫候群症

Angus躺在一張寬敞的貴妃椅上,旁邊坐著一名年青的心理醫生Dr. Lo。Dr. Lo一邊細心聆聽著Angus的描述,一邊做筆記。Angus已經覆診了好幾次,但病情仍然沒有半點起色。

Angus外表斯文,戴著圓框眼鏡,帶點書卷氣,用「弱不禁風」來形容他也不算過份。說話滋陰又怕羞的Angus,在大學圖書館當管理員,少矖太陽,皮膚白皙。愛一人看書食飯、聽交響樂、少交際應酬。他這種怕醜性格是很難結識到異性朋友。

Angus的心理病是:如果沒有受到外間事物刺激到他情緒的話,他跟一個平常文靜的平凡男士無異。但當他被激怒的話,他會突然喪失理智地破口大鬧!好似鬼上身咁變成另一個火爆爛佬。爆炸發狂破壞周遭物件,發狂期間,只要一見到有人喊、一聽到有喊聲,他就立即變回原本溫文柔弱的模樣。停止鬧人不得止,仲會咔咔笑出聲,笑到四萬咁口唔停!

而最攞命的地方:就是他完全不知道自己剛才發生過什麼突變。

最初,旁人仲以為Angus是撞邪鬼上身。Dr. Lo姑且暫稱這種病徵為「變型俠醫候群症.The Incredible Hulk Syndrome」。面對此怪病,Dr. Lo詢問過其他本地及海外心理醫生,都束手無策。

Angus屢醫無效,此時躺在貴妃椅上開始有點不安,繼而情緒開始有點波動,瞳孔開始擴張,血壓急升,拳頭握緊,Dr. Lo見狀,立即用說話催眠Angus,因為Dr. Lo之前都曾經領教過病發後Angus的鐵拳,免得過都唔想試多次。

Angus安靜下來,呼吸放緩。在爆炸邊緣打了個白鴿轉回來。Angus問醫生下次幾時再來覆診?醫生翻一翻手帳後,告訴Angus下週星期四下午三時準時再來。Angus有點氣餒,無奈地離開。

* * * * * * *

一週後,星期四下午2:45分,Angus已經來到診所,等待Dr. Lo。護士說Dr. Lo正在返回診所的途中,着Angus坐下來等候。

全間診所,計埋Angus,只有兩位病人在等候。另一名女子,接近三十歲左右,是一名陽光少女,明眸皓齒。古銅膚色,一頭清爽短髮,猜她愛戶外活動。等到3:15分,仍未見Dr. Lo出現,Angus開始等到有點慌悶。

這位女子叫Fia,主動上前結識怕醜的Angus,Fia說與其等得咁無聊,不如傾吓計解悶。Fia是游泳教練,專教小朋友學游水,性格開朗,樂觀健談、笑容掛嘴。Angus和Fia愈傾愈投契,兩人好像齒輪一樣,互補對方欠缺的性格缺憾。兩人交換電話,約定日後再見面。

Dr. Lo到4:00才出現,馬上向兩人道歉。原來醫生今天要到法庭,替疑犯提供心理評估,怎料個case審耐咗,連累Dr. Lo也要遲到一小時。Angus和Fia沒有怪責醫生,反而從心底裡多謝他的無心造就撮合。

Dr. Lo被邀做証婚人,出席Angus和Fia的婚宴。兩位拍拖一年後結婚,作為紅娘的Dr. Lo,成為席上的重要嘉賓。

但Angus的心理病仍未痊癒,難道樂觀的Fia能夠招架Angus?

非也!

Fia那天也在Dr. Lo診所候診,她當然也有心理病。

Fia的心理病是:如果她的情緒沒有受到外間事物牽動的話,她跟一個樂觀豁達的女子無異。但當她被別人大聲鬧的時候,她會突然情緒失控!好似撞邪咁變成一隻極度恐懼顫抖的小雞咁,失聲狂喊,但只要一聽到笑聲,就會立即變返原本陽光愛笑的模樣。

而最攞膽的地方:就是她完全不知道自己剛才發生過什麼突變。

Dr. Lo姑且暫稱這種病徵為「蛇龜候群症.Scared Syndrome」。面對此怪病,Dr. Lo詢問過其他本地及海外醫生,均束手無策。

結果Dr. Lo把心一橫,特地於那個星期四下午,
全診所只安排了Angus和Fia兩個appointment,然後故意藉詞遲到,讓性格主動的Fia自行去結識內歛的Angus。

兩人拍拖後,當健談又喋喋不休的Fia講呀講呀,講到Angus產生煩躁的情緒,Angus頂唔住終於爆炸,狂鬧Fia,Fia立即喪哭起來。Angus一聽到Fia淒厲的喊聲後,停止漫罵,並忘形大笑。Fia一聽到Angus的笑聲後,立即收聲唔喊。幾分鐘後,兩人同一時間收聲,默然相望,相安無事。大家都忘記了剛才發生過什麼事,一切再重頭開始過。如像電腦boot機一樣,Reset後洗牌再嚟過。

兩人都自知自己有情緒缺憾,所以對對方產生同病相憐之憐愛。唔跟對方結婚?仲可以跟邊個?

雖然Dr. Lo不能根治兩人的心理病,但能令兩人開心,舒緩內心困擾,也可算是心理醫生的職責所在。
而Dr. Lo成功之處,就是他勇於打破框框,唔介意將自己的診所,變作婚姻介紹所。

Dr. Lo舉起香檳酒杯,向一對新人祝酒:「百年好合,永結同心!」賓客紛紛舉杯,掌聲雷動。

Angus和Fia面對如此感人場面,Angus情緒開始波動起來,舉起的手開始顫抖,Dr. Lo見狀,眼也突了出來,「唔好呀!...... 千祈唔好呀!......」

送給lo哥


* * * * * *

結局續寫 By 市場維京人

阿 Augus 同 Fia生咗個BB女,叫Violet。Violet患咗個怪病,每次見到阿爸阿媽喺埋一齊就會抓狂。Augus 同埋 Fia 為咗個女好,唯有唔好同時間喺個女面前出現。到個女上咗幼稚園, 先生焗住話見家長要同時間見齊阿爸阿媽兩位。

Fia為免出醜,揾恩人Dr.Lo出手,扮爸爸見學校Miss,怎料Miss是Dr.Lo的舊情人。Miss以為Dr.Lo娶了Fia,日後上堂處處難為Violet這孽種。

Violet 雖然係豆丁小孩,但對上網非常熱衷。Click 吓 click 下喺挪威嘅華人網站搵到一個自稱沙漠狐嘅殺手。

Violet 為求對 Miss 報復,於網誌留言,希望可以搵沙漠狐對付 Miss。原來沙漠狐不嬲對做 Miss 嘅人都好反感,結果喺挪威森林飛返嚟香港。

沙漠狐攪掂咗阿 Miss。Dr Lo 知道 Miss 嘅死後,悲痛欲絕,生無可戀。隔咗幾年,Dr Lo 亦已經從悲痛中站起來。

有一日,Dr Lo 無意中咁喺網上搵到 Violet 喺沙漠狐個 blog 嘅留言,發現原來主動請殺手殺死 Miss 嘅,竟然係當日曾經做中間人幫佢哋拉埋天窗嘅 Angus 同埋Fia 嘅女。

一剎那, Dr Lo 只有呆著反應不過來,只知道冥冥中自有主宰。想著想著,不期然於眼角下流了一小滴眼淚......

Dr Lo 決定俾錢沙漠狐,殺死Violet!沙漠狐回港,將Violet溺斃。 將昏迷的Violet綁上大可扔落海,以為完成任務!

Angus 和 Fia 報警Violet失蹤,找Dr Lo 幫手,Dr Lo 假裝緊張。 怎料Angus 和 Fia突然情緒激動發作!大打出手!

就快錯手殺死Dr Lo之際,Violet趕到! 因為她是新人類,懂水中呼吸。Violet更指出Dr Lo 是幕後黑手....Dr Lo 被捕, 檢察官竟然是棄商從官的Helena....

Helena 咁靚女,哪個男人不心動?Dr Lo 自己雖然己一把年紀,但 Helena 喺商場打滾咗咁多年,相信年紀亦唔細。只可惜,對方係 Violet 老豆老母 Angus 同埋 Fia 搵嚟告自己嘅檢察官,如果唔係 Dr Lo 肯定第一時間約佢。家下約靚女不成,仲俾由自己一手撮合嘅 Angus 同埋 Fia 鄙視,心中不是味兒。

Helena 又如何呢?當她第一眼看見 Dr Lo 嘅時候,只覺佢時帶憂鬱的表情,樣子常常很沉重的樣子。相信佢搵人買兇殺 Violet 亦有佢嘅苦衷。奈何身份對立,亦不便與他面談。

不過,Helena 真係一位心思細膩嘅女子。當日佢曾假稱家裡也有自慰器,而希望解除 Alex 嘅心魔。今次佢亦深覺 Dr Lo 背後有一個不一樣的故事,於是乎佢搵咗人稱女黑俠嘅 Hana 去作調查。

女黑俠 Hana 知道當日暗殺 Violet 嘅係沙漠狐,心中暗嘲沙漠狐喺挪威做世界做得太耐,一點也不懂香港原來已有懂水中呼吸嘅細路。冇法啦,鬼叫沙漠狐同 Hana 係對歡喜怨家咩?

Anyway,Hana 亦很快手咁查出整件事件,而將之告訴 Helena。

當 Helena 知悉整件事情後,雖知 Dr Lo 買兇殺人係唔啱,但亦知道 Violet 其實係一個好可怕嘅細路,決定退出有關嘅訴訟。本來佢都想勸 Angus 同 Fia 留意下自己個細路,但做家長嘅又點會聽得入耳?

好在嘅係,喺 Violet 面前,Angus 同埋 Fia 永遠都唔可以同時間出現,如果唔係 Violet 會抓狂。於是乎 Helena 為咗幫 Dr Lo,繼搵女黑俠 Hana 幫手外,呢次搵咗據聞大把貞操帶喺手嘅小瓶子出馬。當 Violet 同 Fia 出街食飯嘅時候,就搵小瓶子出去色誘 Angus ............

當 Fia 知道 Angus 去偷食嘅時候,性情大變,搵咗 Violet 嚟發泄。Violet 最後亦知錯,而 Angus 最後亦冇偷食。Angus 冇偷食嘅原因係,小瓶子本來好幾次想如 Helena 所分付約咗 Angus,但當去嘅途中發現金融海嘯大減價,於是乎自己走咗出街 shopping,而唔記得要去冧仔。

最後唔知點樣 Angus、Fia 同埋 Violet 一家人又喺番埋一齊。 最後又唔知點樣點樣,Dr Lo 因為感動而力追 Helena。Helena 當時都不瞅不睬,後嚟 Dr Lo 喺南京搵到一種易容秘技,整到成個 Alex 咁款。Helena 當年其實暗地裡都鐘意空中少爺 Alex 嘅,結果 Dr Lo 就奪得美人歸,同 Helena 走咗去 Paris 結婚。

哈哈,寫完。個結尾連我都覺得好爛! :P

天生一對 - 夢劇院
作曲:KEITH YIP
作詞:夢劇院

愛看海邊那真摯美
獨在思想當天一起
可惜我從不會令你歡喜
想你定將我忘記
從來沒記起

愛看星空那閃爍美
獨在空間在運轉裡
那感覺漸冰冷 沒你共我一起
一切便不覺完美 唯願在某地

在世間讓你我變一對
無懼怕各種困難與唏噓
在我心 全合意
是最真 的一次
心中彼此載滿舊日名字

你我仿似一套戲
盡力演出花點心機
早註定一對 又再共你一起
想已是一切完美
重逢在故地
從來是一對
(完全為了你)(常會念記)

2008年12月8日 星期一

衣櫃裏的狐狸

衣櫃裏的狐狸

赤柱一帶是高尚住宅區,
住在這裡的人非富則貴。
尤其是一些單憧獨立屋;
門前停泊幾部名貴靚車,
屋內有現金珠寶和古董,
都是爆竊匪的頭號目標。

一名「專業爆竊匪」對一間三層獨立屋,早已虎視眈眈,
他計劃了很久,經過長時間觀察統計,知道今夜屋內無人,一於落手做案。
他在美國長大,經常跟黑人爬牆越壁,練得一身敏捷身手,神出鬼沒,自封綽號為「沙漠狐」!
他在背上紋上歌德式死亡派英文字「Desertfox」。

當晚,他成功解除保安系統後,用百合鎖匙開啟大門,潛入豪宅。
他在三樓睡房內的梳妝枱前,在黑暗中埋頭苦幹,把珠寶首飾搗入袋中。
突然聽到睡房門外有人聲,沙漠狐立即躲進衣櫃內。
從衣櫃門隙往外偷看,見到一男一女又攬又錫咁倒在床上纏綿,
他們沒有開燈,沙漠狐估他們是豪宅主人夫婦,為什麼他們這麼早就回來啊?
沙漠狐的袋中已裝有現金和珠寶,諗住睇埋呢場真人表演先走人。

但床上這對痴男怨女咁激情咁瘋狂,唔似啲老夫老妻噃!
不出沙漠狐所料,這對野鴛鴦,突然停哂所有動作!
女驚恐:「弊!老公返!」
男更驚愕:「Oh!Shit!」
女:「快啲匿埋入衣櫃先!」
男馬上連人帶埋地上衣服鞋襪,跳入衣櫃內。

有錢人的衣櫃,當然比一般平民的衣櫃大幾倍,
奸夫不知道在衣櫃內,跟自己相隔半尺的距離,早已坐著一名爆竊匪。
沙漠狐把呼吸聲壓到最低,從櫃門隙,望見她的丈夫回來,
女:「點解.......今晚......突然......咁早返嘅?」
男:「哦,因為......」

沙漠狐和奸夫靜心等待適當時機逃離現場,
突然櫃內「eeeeee......」聲,原來奸夫的電話震機響起,
奸夫馬上cut線,電話屏幕把黑暗衣櫃的一小角,照明了一抹白色。
沙漠狐全身衣著黑色,奸夫未有發覺。

奸夫cut線後,檢查來電紀錄,原來是「豬B」來電,
奸夫不其然喜上眉梢,「豬B」應該是奸夫另一個情人。
奸夫見橫豎都有排等,不如Sent個短訊給「豬B」。

他在鍵盤上按:「開會忙緊,明天趁你老公不在,再給妳執一劑!一劑勁!」
臨sent出短訊時,沙漠狐偷望到電話屏幕上顯示「豬B [9124 1921]」,
咦?!9124 1921呢個電話號碼......咁熟嘅?!
可怒也!9124 1921係沙漠狐自己老婆Coody嗰電話號碼!
哼!呢個淫賊搞人哋老婆都算衰喇,仲衰格到搞埋我老婆!真係罪無可恕!
怒火中燒,沙漠狐的閃電左手,緊掩奸夫的嘴鼻,右手勒緊他的頸,
爭扎一輪,沙漠狐在衣櫃內無聲無色地結束了奸夫的性命。
12時,沙漠狐趁房內無人,走出衣櫃跳窗逃走。
留下全裸的奸夫屍體在衣櫃內,死狀恐佈。

沙漠狐走在赤柱大街,怒氣未消,想打電話給老婆Coody大興問罪之師,
他按電話號碼,按到9124 192第七個號碼時,
才突然驚覺:老婆電話號碼是9124 1927而非9124 1921
吓?因為自己一時大懵,記錯老婆Coody號碼,咁就攞走一個陌生人的寶貴生命?!

沙漠狐估計自己袋中總共有十萬元贓款,回頭離遠望向屋內三樓亮燈的睡房,
心中向男戶主默唸:「咁......呢十萬蚊......就當係我幫你剷除奸夫嘅酬勞喇!」
沙漠狐誤打誤撞,在他的職業生涯中,第一次當上殺手。
沙漠狐隨即打電話給紋身師傅做Booking:「聽日我想喺背脊Desertfox之前,紋多Killer呢個字!」

同一時間,深夜寧靜的赤柱街頭,被女戶主發現屍體的惶恐驚叫聲劃破,
Killer Desertfox聽後,隨手在口袋中取出一張鈔票,把它撕碎,手心一張,鈔票碎片四散風中。
因為他知道殺手每次完成一單殺人任務後,必有一個特定的自選動作,作為他的專有signature。
一瞬間,來去無踪的Desertfox已經消失在黑夜之中。
冷冷長街,只剩下金色鈔票碎片,隨風飄蕩。


送給
Desertfox

(Photo by Greeny Jay)

2008年12月5日 星期五

青山道同學

青山道同學

星期六早上,Eric獨自一人在青山道某茶餐廳,一邊看報紙一邊吃早餐,結帳後,Eric穿過球場,到附近的投注站買馬,在行人路上,離遠有一位路人,正朝Eric迎面走過來,他衣著老土、雙眼無神,頭髮油膩蓬鬆,Eric覺得他很面善,但一時間又記不起他是誰?

兩人尚有幾尺身位距離,Eric終於醒起他是誰。他是Eric的中三同學,花名叫「痙攣」,因為他行徑古怪,傻頭傻腦,幾常被班中幾位惡霸同學取笑和欺負。Eric是旁觀者,沒有參與欺負也沒有加予阻止。沒有同學願意跟「痙攣」玩,長期被人孤立。Eric中三轉校後沒有再跟「痙攣」聯絡,想不到十一年後竟會在街上再遇。

Eric立即垂下頭,唔想被「痙攣」認出,想快步擦身而過。怎料「痙攣」突然在Eric背後,大聲嗌:「喂!你記唔記得我呀?我係『李敬聯』呀!」
Eric嘆氣:「痙攣」又傻唔哂喎!十一年後都俾佢一眼認得出!
痙攣走上Eric跟前:「記唔記得我呀?我哋一齊讀『黃鎮波紀念中學』吖嘛!」
Eric知道已經避無可避,只好跟他敷衍寒暄兩句:「咦!又會咁蹺嘅?!」

一番廢話後,痙攣問Eric:「嗱!幾時出嚟飲茶先?」
Eric:「好吖!揾日呀!」
痙攣:「俾你電話號碼我呀!」
Eric:「er......er......9458 7263呀」
其實Eric的號碼是6521 4589,一心亂講敷衍了事。

痙攣聽後,馬上取出自己的手提電話,在Eric面前按下9458 7263。
痙攣:「我而家打俾你,咁你睇番來電顯示,咪知我電話號碼囉!......我打啦!」
Eric心諗:「弊傢伙!我頭先亂吹,我電話一定唔會響過噃!」
Eric立即從褲袋中取出電話,手微微震動,扮作自己部電話響緊不過教咗震機啫,
Eric假扮按「end」鍵後,望一望屏幕,扮知道:「OK!收到啦!」
痙攣:「真係收到?咁幾多號呀?讀出嚟聽吓吖!」
Eric:「吓?......唔使啦,唔會錯嘅!我會save你個號碼......」
痙攣激動地:「哼!你講大話!我頭先根本就無打過俾你,我扮打電話俾你之嘛!」
Eric:「吓?你......你....扮打?..」
痙攣:「你點解要呃我呀?!!」
Eric:「er......er......玩吓......之嘛......」
痙攣情緒激動,緊緊抽著Eric衣領不放,大力猛搖!
痙攣當街大聲質問:「點解?!點解你要咁對我?!」
Eric緊張:「放手呀!」兩人在街上糾纏起來,路人紛紛結集圍觀。

Eric唔知點收科之際,救星駕到!人群中走出一名30歲男子,一手拉開痙攣,好勞氣咁問痙攣:「你又走咗去邊呀!衰仔!」

此男士是痙攣的親生大哥,原來痙攣兩年前患上輕度精神病,服藥後病情受到控制,但近日病情反覆,這個早上阿哥正帶痙攣去睇精神科醫生。怎料在街中被痙攣走失,幸而阿哥朝嘈吵的人群中走去,結果就找回痙攣。及時解救了Eric的尷尬困局。

當阿哥向Eric賠過不是之際,痙攣已經悄悄走到另一個路人面前:「喂!我係李敬聯呀!你記唔記得我呀?我哋一齊讀『黃鎮波紀念中學』吖嘛!」路人甲見狀,立即避開,痙攣馬上轉向路人乙:「喂!我係李敬聯呀!你記唔記得......」

原來痙攣病發,逢見到路人,唔理佢係邊個乜水,就上前追問:「唔記得我呀?」其實痙攣根本就認不出Eric,只是咁啱得咁蹺捉正Eric嚟問啫。Eric目送阿哥跟痙攣拉扯離開的背影,心裡苦笑。

十一年前以為痙攣只是一名傻仔,今天竟然反被他戲弄。Eric不其然有點意難平。但長期受欺壓的痙攣,今天終於修成正果,真正傻了,未嘗不是一種解脫、一種自在。
不其然又戥他有點安慰。能夠無煩惱地生活,畢竟是一種福氣。

Eric心諗這樣給痙攣誤打誤撞遇上,或然率是十分之低,既然咁都撞到正,今日可能有機會中三T。

Eric想到這裡,他在陽光下,笑笑口朝投注站闊步邁進。

送給Eric

* * * * * * * *

初中同學 (延續篇)By 歪歪

Eric在陽光下,笑笑口朝投注站闊步邁進。突然,靈機一轉,想到還有一段頗長的路才到醫院,萬一李敬聯又走失,這次未必能被找回,Eric有點不放心,反正自己有時間,決定加入護送行列,於是便轉身走去找回李敬聯兩兄弟。

終於三人順利到達醫院,坐了不久便輪到李敬聯入房見醫生,而Eric便和李大哥談起李敬聯的情況。原來以他的成績本來可升讀中四,但他卻偏不肯上課,無論家人怎樣追問原因,李敬聯甚麼都不肯說出來,自此便輟學一直獃在家裏,他孤僻的性格亦變得越來越嚴重,一、兩年後便開始得了精神病。

Eric聽了覺得很內疚,當年和大部份同學一樣袖手旁觀,即使覺得李敬聯常被糟質很可憐,但為了不想被牽連,所以都無勇氣開聲阻止;大家更不敢跟李敬聯做朋友,因為生怕會成為下一個犧牲品。總之有李敬聯作為被欺負目標,其他同學便會安全。

李大哥又說敬聯這兩年病情反覆,當中主要原因是家裏各人為口奔馳,沒時間陪敬聯看醫生,覆診次數也就減少了。於是Eric便自動請纓,提出日後若有需要,會樂意帶敬聯覆診,李大哥聽後非常感激。

從這天開始,每個月之中Eric會付責帶李敬聯覆診兩、三次,為了避免中途走失,Eric會緊緊拖著他的手往返醫院,有時再加上敬聯的舉動,難免惹來途人的注視,但Eric一點也不介意。

經過半年的定期覆診,李敬聯的情況進步了許多,可以和人交談溝通。Eric更帶他去剪髮和換過一副眼鏡,甚至將自己的舊衣服送給李敬聯,令他看起來整齊乾凈,而為了配合這個新開始,Eric為李敬聯起了一個英文名叫Kirin,麒麟。

每月跟舊同學的聚會,Eric亦會和Kirin一起出席。最初他只有陪笑的份兒,到漸漸熟絡後,Kirin也會加入話題,因為他的率直性格,不會說轉彎抹角的話,這就反而更易令人受落,Kirin很高興自己終於能夠和這班初中同學做朋友。

而另一件值得高興的事,就是Eric在陪Kirin覆診時,認識了新來的護士Joyce,並展開追求。最初Joyce都拒絕了Eric,後來從其他同事口中知道了Eric和Kirin之間的事,覺得Eric是一個好男仔,才放心開始跟他約會。

拍了四年拖,Eric和Joyce終於決定結婚,大婚當日必然少不了Eric一班舊同學做戥穿石,而伴郎一職則由Kirin擔任。穿上了禮服,Kirin神采飛揚,沒有人會想到他曾是一位精神病人。當接新娘時,面對一班姊妹團毫不客氣的諸多要求,他都樂意服從,更被各人稱讚為最佳伴郎。

晚上婚宴時,新郎Eric上台致詞說:「今日我贏得美人歸,其實能夠識到Joyce,我係需要多謝一個人,佢就係我嘅伴郎Kirin。我好慶幸當年响街撞返佢之後,並無各走各路,反而係從新認識對方,因此成為好朋友,亦係咁佢令我遇上我太太。多謝你!」

在一輪掌聲之下,Kirin上台跟Eric先握手,然後向在場賓客,將當日在街上Eric講大話扮收到電話的瘀事講了出來,引得哄堂大笑,然後認真地說:「其實應該係我多謝Eric至啱。我係一位精神病康復者,當年我情況好差,但係多得Eric陪我去睇醫生,仲教曉我點樣同人相處溝通,幫助我尋獲自信,令到我可以揾到工做、重新融入社會之餘,最重要係讓我感受到人間有情,多謝我人生中第一位朋友,Eric。」

說罷,兩人緊緊擁抱,不禁一同流下男兒淚。台下的賓客都被感動得眼濕濕,有些甚至起立鼓掌。所以,誰說婚禮上的感人場面,一定是要由新郎新娘來演。

(完)

-----------------------------

卡臣,唔好介意我又嚟踩場,仲咁遲先加個大團圓結局。(我知打字打得好慢。)既然卡臣咁孤寒唔寫個女角入去,希望Eric鍾意我送呢個靚女護士俾佢做老婆。

Queen - FRIENDS WILL BE FRIENDS

Another red letter day
So the pound has dropped and the children are creating
The other half ran away
Taking all the cash and leaving you with the lumber
Got a pain in the chest
Doctors on strike what you need is a rest

It’s not easy love but you’ve got friends you can trust
Friends will be friends
When you're in need of love they give you care and attention
Friends will be friends
When you're through with life and all hope is lost
Hold out your hands cos friends will be friends right till the End

Now it's a beautiful day
The postman delivered a letter from your lover
Only a phone call away
You tried to track him down but somebody stole his number
As a matter of fact
You’re getting used to life without him in your way

It’s so easy love cos you got friends you can trust
Friends will be friends
When you're in need of love they give you care and attention
Friends will be friends
When you're through with life and all hope is lost
Hold out your hands cos friends will be friends right till the end

Its so easy love cos you got friends you can trust
Friends will be friends
When you're in need of love they give you care and attention
Friends will be friends
When you're through with life and all hope is lost
Hold out your hands cos friends will be friends right till the End

Friends will be friends
When you're in need of love they give you care and attention
Friends will be friends
When you're through with life and all hope is lost
Hold out your hands cos right till the end
Friends will be friends

2008年12月3日 星期三

呢一代細路哥

呢一代細路哥

2013年出生的陳逸明,他今年已經七歲大了。
陳逸明一人閉氣躲在泳池底,一坐已經坐了五分鐘。
他害怕給別人知道自己擁有「水中呼吸」的特異功能,
五分鐘後便游回水面,假扮換氣,
雖然他知道自己能夠坐在水中,大半天也不成問題。
他沒有將這身體秘密告訴任何人知道,因為害怕別人覺得他是「怪人」。

2020年的香港,沒有變成科幻電影中的未來世界大都會,
只是通訊器材更微型方便、公共運輸系統更快捷完善、
更多新型建築物地標落成、新界80%林地已開發成商住用地、人類更依賴人工智能、癌症已不是絕症、人口老化問題白熱化......

雖然七歲的陳逸明是一名小學二年班學生,但2020年的孩子已經十分早熟。
他同班有一位六歲女孩,叫「李少馨」,兩人都是鄰居,
自幼稚園直升小學,兩人都是同班同學;班房內更被編坐在一起,青梅竹馬,
他們每天一起乘校車返校和回家。
雖然2020年的男女初戀年齡中位數是六歲,但陳逸明和李少馨,未有一位肯踏出第一步,兩人只屬「孩提玩伴」關係。

2020年2月14日情人節,陳逸明和李少馨放學乘搭校車返家,在車廂中,
陳逸明突然對李少馨說:「我......有啲嘢......想同妳講......」
李少馨答:「咁啱嘅?!我......都有啲嘢......想同你講......」
陳逸明:「我......我想話俾妳聽......我......我......」
李少馨:「唔好吞吞吐吐,你講啦!」
陳逸明:「我......Daddy噚晚......買咗部Virtual Sport俾我......咁李少馨......妳有乜同我講呀?」
李少馨:「我......我想同你講......我......媽媽應承同我Simulation Trip!去南極玩呀!」
陳逸明:「咁好?!」兩人欲言又止,之後無言望窗。

一星期後,兩人放學後,乘校車回家,冬天的黃昏,未夠6點已經天黑。
陳逸明和李少馨是尾站才下車,車上大部份的同學已逐一下車回家。
校車內只剩下陳逸明、李少馨、兩位同學、司機和保母,一共六人。

陳逸明問李少馨:「不如陣間,上我屋企玩Virtual Sport呀?」
李少馨:「好呀!我打電話俾......」
李少馨連「我媽媽......」三字都未講完,「轟隆」一聲龐然巨響!
校車被公路對行線一輛失控貨櫃車,猛烈地迎頭相撞!
成架校車返轉咗!車廂內人如骰子般跌撞!
校車碌落青山公路旁,跌落冰冷海水中。
擋風玻璃被撞破裂,海水不斷湧入車廂內,加速汽車往下沉的速度。

陳逸明沒有驚惶失措,因為他知道自己在水裡呼吸的功能終於可以大派用場!
今次終於可以上演一幕「英雄救美」,更能成為新聞頭條人物。
他見到司機和保母已經昏暈了,但李少馨和其他兩位同學,則不見影踪。
陳逸明第一時間想找回李少馨,但隨著車廂下沉,光線微弱而變得愈來愈漆黑,最後眼前一片黑暗。
自己空有「水中呼吸」的功能,但失去視力,也是徒然!更遑論去救人?

點算好呢?!......

此時,一隻手握著陳逸明手臂,陳逸明憑感覺:這隻手是屬於李少馨,
而一對滲出綠光的眼睛,正望著自己,這雙綠眼也是屬於李少馨。

原來李少馨也一樣擁有「水中呼吸」的異能,她游上前拖著陳逸明。
而在李少馨身後,有兩對發出綠光的眼睛,是來自另外兩位同學的臉上。

陳逸明在這一刻,終於明白原來在這個世界上,
除了自己之外,還有其他人懂得水中呼吸;
而且竟然是身邊青梅竹馬的李少馨和同校車的兩位同學。
李少馨除了能水中呼吸外,還有在漆黑環境中視覺如常的「夜光眼」。
李少馨和其餘兩位同學,合力拖著昏迷了的司機和保母,游上水面。

原來到2020年,因為地面環境的空氣食水已經嚴重染污、太陽紫外光太猛烈、氣溫氣候反常、溫室效應、陸地愈來愈不適合人類居住。
人類本身有「DNA自我進化.Self evolution」的功能,自行改變自已的基因結構來適合於海中水底生活,下一代已經進化到可以在水中呼吸,
因為海床太黑,新人類也有「夜視」的功能。
陳逸明因為父母DNA出錯,只具有「水呼」而沒有「夜視」功能。
而新人類因面對太多地震風暴等天然災禍,人類身軀亦自我進化到可以抵擋強力撞擊力。小朋友在車廂中連環跌撞也無大礙。

2月14日那天,陳逸明和李少馨想向對方透露這個身體秘密,
但最後兩人都驚被對方以「怪物」對待,話兒說到嘴唇邊便收回肚裡。
中年的校巴司機和保母,當然沒有新人類這種進化功能。

夜幕漆黑的公路旁,警車的紅藍色的警號燈閃爍著,
數支照射燈打進水裡,打撈校車。
警方對小孩們僅受皮外傷和英勇水中表現,嘖嘖稱奇,
並交給科學家跟進。

陳逸明和李少馨的心底秘密,應該說是很多其他小朋友們的心底秘密,
都在這一宗交通意外後,意外地一次過集體性揭露出來。

送給佚名

LinkWithin

Blog Widget by LinkWithin