~~~~~~~~~~~~~~~~







2010年5月8日 星期六

外科醫生話

外科醫生話

記憶中,我最早接觸到外科醫生的形象和印象,是來自我幼時睇香港電視劇,從那些場面和對白,揍合成醫生的輪廓。
今次數一數香港電視劇中,外科醫生會常講什麼說話?

第十位:「我今晚要早啲瞓,聽朝一早有手術。」
有大手術要做,病人條命交托在醫生手上,性命攸關。如果醫生前一晚有約,會提早告辭:「今晚要早啲瞓,聽朝一早有手術。」電視劇中,如果聽朝無手術,醫生放工後,都會約埋一齊去中環蒲,或海邊吹Saxophone。

第九位:「唔好意思,趕住返醫院救人!」
一輛名貴汽車超速,遭交通騎警截停在路旁,醫生好緊張咁向交通警出示証件:「唔好意思,趕住返醫院救人!」咁交通警就會網開一面,放走醫生。而在電視劇中,間中醫生也會濫用這特權。

第八位:「同佢傾多啲偈,幫佢恢復記憶。」
病人患上失憶症,痴痴呆呆。醫生對病人的家屬說:「同佢傾多啲偈,幫佢恢復記憶。」雖則講就係咁講,但在電視劇中,失憶病人最後好返,通常全靠另外一吓意外的頭部撞擊,立即乜嘢都記番起哂!

第七位:「手術好成功,但係病人仲未渡過危險時期。」
病人遇上嚴重意外,送到急症室搶急。病人家屬朋友站在急症室等候,心急如焚。醫生走出來,病人家屬一擁而上:「醫生!點呀?!醫生!」
醫生除下口罩,喘一口氣:「手術好成功,但係病人仲未脫離危險時期。」在電視劇中,ICU中的昏迷病人,通常都是有化妝,面色紅潤。

第六位:「你哋要做好最壞嘅心理預備。」
手術室的手術燈熄滅了,醫生步出來,病人家屬朋友一擁而上:「醫生!點呀?!醫生!」 醫生除下口罩,搖搖頭:「你哋要做好最壞嘅心理預備。」家屬朋友失聲哭了出來,唯有祈禱,等待奇蹟出現。

第五位:「對唔住,我哋已經盡哂力。」
醫生要向病人家屬報告死訊,不會直接地說「病人已經死亡。」而是婉轉地說:「對唔住,我哋已經盡哂力。」意思是撇除了所有醫療失誤和失當,醫生已經盡哂力,都救唔返病人,只因病人體質太虛弱了。

第四位:「大家鎮定啲,我係醫生!」
在鬧市街頭,有途人突然受傷或昏迷,旁人措手無策。這個時候,醫生剛巧路經,立即十分鎮定地,從人群中走出來,表示身份:「大家鎮定啲,我係醫生!」進行初步急救:「大家退後,俾多啲空氣、解開佢嘅頸喉紐……」在旁的女主角被醫生的魅力所攝住。

第三位:「…抹汗…」
外科醫生正在做手術,助手們從旁協助。穿上手術袍的醫生,隔著口罩說:「止血鋏、手術刀……」助手便立即遞上手術工具,還有一句:「…抹汗…」,護士立即上前抹汗。免得汗水流入眼睛,影響手術的準繩到。

第二位:「Certified!死亡時間係…」
病人的脈搏儀器,由有節奏的起伏,最後變成了一條直線。病人失救死亡,要紀錄低死亡時間,醫生用「Certified」一字,證實病人的死亡。「Certified!死亡時間係…下午3時8分…」

第一位:「Clear!」
病人的脈搏由強轉弱,接近停頓,在這危急關頭,醫生出最後法寶,用電激儀器,刺激病人心臟,令它再次跳動。醫生向身邊人大嗌:「Clear!」電擊到成個病人彈起,之後再進行心外壓和人工呼吸。但病人始終都係無乜反應,醫生重複向身邊人大嗌:「Clear!……」成為醫生又有型又英偉的專業英文術語。



講完醫生,輪到講吓病人。我第一次接觸到「血癌」兩個字,是1985年聽到張學友的《遙遠的她》。我喜歡有故事的歌詞。



遙遠的她 - 張學友

讓晚風輕輕吹送了落霞
我已習慣每個傍晚去想她
在遠方的她此刻可知道
這段情在我心始終記掛

在這半山
那天我知我知快將要別離沒說話
望向她 卻聽到她說
不要相約 縱使分隔
相愛不會害怕
遙遙萬里 心聲有否偏差
正是讓這愛試出真與假
遙遠的她 彷彿借風聲跟我話
熱情若無變 那管它滄桑變化

但這天收到她爸爸的一封信
信裡面說血癌已帶走她
但覺得空虛的心彷彿已僵化
過去事像炮彈心中爆炸

在這半山
這天我悲痛悲痛不已在胡亂說話
夜雨中 似聽到她說
不要相約 縱使分隔
相愛不會害怕
人無覓處 心聲有否偏差
正是讓這愛試出真與假
遙遠的她 彷彿借風聲跟我話
熱情若無變 那管它滄桑變化

遙遠的她 不可以再歸家
我在夢裡卻始終只有她
遙遠的她 可知我心中的說話
熱情並無變 那管它滄桑變化

遙遠的她 不可以再歸家
我在夢裡卻始終只有她
遙遠的她 可知我心中的說話
熱情並無變 那管它滄桑變化
啊…

15 則留言:

  1. 卡臣:

    我真是被做過大手術,住過ICU。第一次見外科醫生,他就說,這是一個高風險手術,失誤率是##%。有人在手術中瓜了,有人出來....我完全估唔到手術的結果。

    我當堂被個醫生既說話嚇到作嘔呀!真係想唔講「@#$%^%#^@#%」都唔得呀!

    好彩,原來個醫生托定屎忽吊頸,我仲有命出番黎睇四仔。

    回覆刪除
  2. 明明怕血,但係都逼自己睇E.R.,無非為咗睇George Clooney。

    《遙遠的她》,讀中學時心儀嘅對象用呢首歌參加學校嘅歌唱比賽,諗落真係好遙遠。

    回覆刪除
  3. 佛爺

    你入過ICU?
    正所謂:大難不死,必有後福

    個手術是否「換X具」呀?

    ++++

    naruto

    畢竟隻歌都25年前

    ++++

    歪歪

    鐘意George Clooney?
    咁你一定有睇up in the air

    原來《遙遠的她》對你有段故事,

    我讀中學時,看黃耀明主演的「戀愛季節」
    第一段戲便用《遙遠的她》
    十分喜歡

    回覆刪除
  4. 卡臣:

    我都想係換咗條是非根呀!換條假嘅,反而唔洗咁心煩呀!嘻嘻!

    回覆刪除
  5. 原來個醫生托定屎忽吊頸 <=== 請問呢句典解呢 ??

    我記得果句係 : 手術好成功, 但病人救唔番! 哈哈~~~

    回覆刪除
  6. 卡臣:

    換條馬鞭,我出街仲煩呀!嘻嘻!

    回覆刪除
  7. kateyip

    托定屎忽吊頸
    ...我都想知點解
    我估是: play safe/補底 的意思啩

    睇吓佛爺會唔會解吓

    手術好成功, 但病人救唔番!<---哈哈
    還有:
    醫學上仲未可以解釋到成因

    回覆刪除
  8. kateyip:

    你要等卡臣解釋俾你聽,我識得用,但係唔知點講。

    回覆刪除
  9. 佛爺

    咁我解得啱唔啱呀?


    你帶條馬鞭出街?
    你係騎師呀?

    回覆刪除
  10. 卡臣:

    你好嘢!將馬鞭另有演繹。嘻嘻!

    我想到點解釋托定屎忽吊頸,即係怕死,但又要做,咁托住屎忽,然後上吊,邊會死得去架!

    即係個醫生先講明,手術出黎,可能會不舉。咁手術完咗,真係不舉,就無得怪個醫生囉!但若果手術出黎依然咁勁,咁個醫生都無衰既啫!

    你的解釋都係一樣咁嘅意思。

    回覆刪除
  11. 『咁你一定有睇up in the air』

    哎吔,聽講好好睇,但係我仲未睇呀!啱啱忙完搬屋同裝修,多兩個星期我爹哋媽咪將會嚟,所以最快都要六月中先有時間睇呀。

    回覆刪除
  12. 歪歪

    父母去探你呀?
    好呀!
    享吓天倫樂啦
    新屋又咁靚

    回覆刪除
  13. 哦~~~托定屎忽吊頸 原來咁解既~~~
    睇 blog 學俗語 ! 哈~~哈~~~

    回覆刪除

LinkWithin

Blog Widget by LinkWithin