~~~~~~~~~~~~~~~~







2013年11月12日 星期二

蒸發人間 - 下集



蒸發人間 - 下集


阿飛唔埋一切,冒著被汽車撞死的危險,衝過馬路,口中大叫「KellyKelly…….

怎料Kelly耳戴headphone聽歌,對任何叫聲充耳不聞。正當阿飛奔跑到對面馬路時,Kelly剛好截停一部的士,登車絕塵而去。

阿飛想追,但環照四周,揾部的士睇吓都無,「難得個天肯俾我遇番Kelly,唔好咁玩我啦!」阿飛急如鍋上螞蟻,這時一部電單車正迎面駛來。阿飛無計可施之下,路中心「大字型」截停了這部「薄餅速遞電單車」,硬著頭皮問電單車司機可唔可以車佢一程?但唔問過又唔知答案。

阿飛問完都自覺荒謬,人開緊工送Pizza,點會肯幫自己?

Pizza哥哥望著情急的阿飛,沉默了兩秒:「上車啦!」
阿飛千多萬謝Pizza哥哥,戴上spare頭盔後,阿飛成世人首次登上「薄餅速遞電單車」的後座,踩油狂追的士。

阿飛緊張地說:「唔該追住前面架的士!KT2592部!」Pizza哥哥點一點頭:「坐穩啦!」全速追逐100米前那部的士。

Pizza哥哥一邊追的士,一邊大聲向後講:「你好彩啦!我上個月同我「掃把」嗌交,遞信resign。今日啱啱last day,送Pizza遲咗?我專登架!佢吹得我脹咩?!」阿飛只是傻傻地附和:「啱嘅!……係嘅!……吹你唔脹」。

五分鐘追逐後,目標的士停在火車站前,Kelly下車,入閘轉乘火車。

阿飛多謝完Pizza哥哥後,除下頭盔,跳下電單車,直追入閘口。突然Pizza哥哥在自己身後大聲嗌:「喂!」

阿飛以為對方要攞錢作酬勞,回頭望見Pizza哥哥,笑說:「喂!攞盒Pizza去食!」
阿飛:「但係…..你咪會…..俾客人投訴囉?!」
Pizza哥哥:「理得佢呀!…..記得要追到條女返嚟呀!」
阿飛點頭道謝:「一定會!」Pizza哥哥駕電單車離開。

阿飛在火車入閘機前,伸手入褲袋想取出銀包中的八達通時,Shit!剛才在茶餐廳門外抽煙,銀包和電話仍留在茶餐廳內,自己身無分文。

阿飛情急之下想跳閘進入,突然被一名在閘內穿著黃色制服的站務員喝止:「喂!你做乜呀!」
阿飛:「Sorry!我唔記得帶銀包,唔該通融一次俾我入閘呀!」
站務員:「呢位先生,你賣飛啦!我唔可以俾你入架。」
阿飛:「呢度有個Pizza,仲熱架!你收咗佢!當我買飛吖!」
站務員:「先生,我幫唔到你!你快啲賣飛啦!」

阿飛只好向其他準備入閘的乘客埋手:「唔該!借幾蚊俾我,你攞走個Pizza!無毒架!」、「唔該!借幾蚊俾我,我要入閘追返我女朋友呀!」結果乘客們當阿飛精神有問題,擰歪面唔埋佢,急急入閘。阿飛擔心火車隨時會載走Kelly,十分徬徨。

阿飛無計可施之際,面前的閘突然發出「嘟」一聲,一名40歲西裝男士,手拍八達通,向阿飛示意:「入啦!」阿飛十分感激:「多謝哂!送個俾pizza你吖!」西裝男士:「使乜客氣!幾蚊雞算得乜?!快啲去追返個女朋友先講啦!」原來西裝男士之前也有與女朋友追逐的相同經歷,十分理解阿飛這刻的焦急心情。願意出手相助。

阿飛入閘後,究竟上「往羅湖」的月台?還是上「往尖沙咀」月台?二分一機會,阿飛選擇跑上「往羅湖月台」,兩頭望,弊傢伙!唔見Kelly喎。

反而見到對面「往尖沙咀」月台上,Kelly正一邊看愛情小說、一邊等候火車。這時往尖沙咀的火車,剛好駛入月台,阿飛遙遙地大叫:「KellyKelly!」可惜Kelly戴著headphone,充耳不聞。Kelly被火車遮擋了阿飛的視線,車廂內乘客太多,阿飛看不見Kelly蹤影。

阿飛很失望,掩頭蹲下,花了這麼多工夫去追Kelly,最後還是功虧一簣。

當火車站發出「嘟聲」後,火車往尖沙咀方向駛離月台,對面月台上剩下Kelly站於原地,她望見6米以外滿頭大汗的阿飛。兩人遙遙對望,阿飛狂揮手,全速拆返到Kelly那邊月台。

原來剛才站在Kelly身旁的一位中學生,見阿飛向這邊呼叫!好奇地問Kelly:「小姐,對面嗰位先生好似叫妳喎。」Kelly直覺告訴自己對面的人是阿飛。多得這一位中學生一攔,火車閉門駛離後,兩人終於在火車站再次相遇。

阿飛奔到Kelly跟前,唔理咁多,先向Kelly說:「妳嫁俾我啦!」Kelly臉上沒有半點輕奮,向阿飛搬出一段從愛情小說裡看回來的理論:「我憎你唔敢承擔!愛情好似劃火柴咁,最初劃嗰一吓最光最熱,之後慢慢變暗變弱,當火柴燒到尾嗰陣,你覺得痛覺得辣手,立即放手。咁樣、段感情咪冇咗囉!你明唔明?」

Kelly的說話一針見血,阿飛一時言塞。Kelly見阿飛無言,轉身背向阿飛,大步走遠離開。行了幾步,背後的阿飛大聲叫:「Kelly!」

Kelly回頭望阿飛,他已從袋中取出火柴,「咔嚓」一聲點著火柴,當火柴燒到最尾時,阿飛忍痛唔放手,咬緊牙關:「鳴~唔~」

火柴雖然熄滅、燒成灰燼,但殘渣仍被挾在阿飛的食指和母指之間。阿飛苦笑說:「我無放手喎!」Kelly見狀立即走上前,檢查阿飛手指的傷勢,說︰「正傻佬嚟架!」兩人冰釋前嫌。阿飛對自己說:「從今要好好對待Kelly。」

兩人隨後坐在火車站月台的長凳上,互相交換這三個月的近況︰Kelly去了什麼國家旅行?阿飛如何鍥而不捨地找尋她?一面傾、一面分享Pizza哥哥送的微溫pizza

阿飛右手手指灼了個水泡,放在膝蓋上休息,左手緊握著Kelly的右手,Kelly用左手把Pizza一口一口餵到阿飛嘴裡。他們坐在月台盡頭,幸而沒有鐵路職員前來干涉。

這個Pizza份外好味。令到這Pizza的味道昇華,除了面前有吐露港的夕陽美景作點綴之外,還因為有一份失而復得的感情包圍著他們。


二少爺說︰「如今天色已晴,情淚已像雨般失蹤影。」

16 則留言:

  1. I love this story.

    我唔係挑剔,更加唔係想挑釁,
    只係想知,嗰位幫阿飛嘟咗一下八達通嘅男士,
    佢點樣解決出閘嘅問題?^.^

    回覆刪除
    回覆
    1. 多謝你先

      當然知道你不是來挑機,等我補充一下︰

      西裝友搭完火車 出閘後,行過入閘處,見阿飛咁慌忙,出手用八達通 dou 俾阿飛入閘,自己下次搭火車時才去票務處處理張八達通。

      刪除
  2. 卡臣:

    這個故事的標題應該叫「薄餅重圓」。嘻嘻!

    回覆刪除
  3. 一個好好嘅happy ending,雖然有少少誇張,但都好感人。原來「劃火柴」係有伏線嘅,你係得嘅。

    阿飛攞住火柴嗰一段好正呀,我喺度諗,如果拍成電影,而導演頻頻嗌NG嘅話,拍完套戲男主角分分鐘要切手指呀。 :p

    回覆刪除
    回覆
    1. 多謝先
      如果唔係後期電腦效果,我諗無人拍囉~~

      刪除
    2. 呢d咁危險嘅動作場面,手指部份可以用替身,輪到面部表情嗰part,先zoom埋去男主角嗰樣度。

      刪除
  4. 有情人终成眷属。。。希望能白首偕老~~:)

    回覆刪除
  5. 上次留言你話"Kelly會當街摑阿飛16巴,之後就破鏡重圓"...不過我覺得而家咁結尾仲好睇^^!

    回覆刪除
  6. 當火柴燒到最尾都唔放手, 呢個point好得. 係Kelly睇的愛情小說橋段, 定卡臣哥諗出來?

    回覆刪除

LinkWithin

Blog Widget by LinkWithin